പകർച്ചവ്യാധികൾക്കൊപ്പം മങ്കിപോക്സും; ആശങ്കയൊഴിയാതെ കേരളം

വൈറൽ രോഗമായതിനാൽ വാനര വസൂരിക്ക് പ്രത്യേക ചികിത്സ ലഭ്യമല്ല

തിരുവനന്തപുരം: പകർച്ചവ്യാധികൾ വ്യാപകമാകുന്നതിനിടെ, സംസ്ഥാനത്ത് ആശങ്കയുയർത്തി മങ്കിപോക്സും. വിദേശത്തു നിന്ന് വന്ന ഒരാളിൽ രോഗം സ്ഥിരീകരിച്ചതോടെ പഴുതടച്ച പ്രതിരോധത്തിന് ആരോഗ്യവകുപ്പ് നിർദേശം നൽകി. നാലാം തരംഗത്തിന്റെ സൂചന നൽകി കോവിഡ് വ്യാപിക്കുന്നതിനിടെ മങ്കിപോക്സും റിപ്പോർട്ട് ചെയ്തത് ആരോഗ്യ മേഖലക്ക് വെല്ലുവിളിയായിരിക്കുകയാണ്. ആശങ്കക്ക് വകയില്ലെന്ന് ആരോഗ്യവകുപ്പ് അറിയിച്ചു. എന്നാൽ, 65 രാഷ്ട്രങ്ങളിലായി പതിനായിരത്തിൽപരം പേരിൽ റിപ്പോർട്ട് ചെയ്ത മങ്കി പോക്സിനെതിരെ അതിജാഗ്രത വേണമെന്നാണ് ലോകാരോഗ്യ സംഘടനയുടെ മുന്നറിയിപ്പ്. യൂറോപ്പിനു പിന്നാലെ അമേരിക്കയിൽ രോഗം സ്ഥിരീകരിച്ചപ്പോൾ തന്നെ ജില്ലകൾക്ക് ജാഗ്രത നിർദേശം നൽകിയെന്നും പ്രത്യേക യോഗം വിളിച്ച് മുൻ കരുതലുകൾ സ്വീകരിച്ചെന്നും ആരോഗ്യ വകുപ്പ് പറയുന്നു.