திருப்பரங்குன்றம் தீப விவகாரத்தில் சமாதானப் பேச்சுக்கு வாய்ப்பில்லை

திருப்பரங்குன்றம் தீப விவகாரத்தில் சமாதானப் பேச்சுக்கு வாய்ப்பில்லை என சென்னை உயர் நீதிமன்ற மதுரை அமர்வு தெரிவித்தது.

- 

திருப்பரங்குன்றம் மலை உச்சியில் உள்ள தூணில் தீபம் ஏற்றுவதற்கு தனி நீதிபதி ஜி.ஆர். சுவாமிநாதன் பிறப்பித்த உத்தரவுகளுக்கு எதிராக, கோயில் நிர்வாகம், வக்ஃப் வாரியம், மதுரை மாநகரக் காவல் ஆணையர், மாவட்ட ஆட்சியர் தரப்பில் மேல்முறையீட்டு மனுக்களும், எழுமலையைச் சேர்ந்த ராம. ரவிக்குமார் உள்ளிட்ட சிலர் இடையீட்டு மனுக்களையும் தாக்கல் செய்தனர்.

இந்த மனுக்கள் உயர்நீதிமன்ற நீதிபதிகள் ஜி. ஜெயச்சந்திரன், கே.கே. ராமகிருஷ்ணன் அமர்வு முன் 4-ஆவது நாளாக புதன்கிழமை விசாரணைக்கு வந்தன.

அப்போது, ராம. ரவிக்குமார் உள்ளிட்ட எதிர்மனுதாரர்கள் தரப்பில் முன்னிலையான வழக்குரைஞர்கள் முன்வைத்த வாதம்:

திருப்பரங்குன்றம் மலை உச்சியில் உள்ள தூணில் தீபம் ஏற்றும் விவகாரத்தில் உயர்நீதிமன்ற உத்தரவை நிறைவேற்றுவது மாநில அரசின் கடமை.