திண்டுக்கல், தேனி மாவட்டங்களில் விநாயகர் சதுர்த்தி சிறப்பு வழிபாடு

விநாயகர் சதுர்த்தியை முன்னிட்டு, திண்டுக்கல் மாவட்டத்தில் கோயில்களில் புதன்கிழமை சிறப்பு பூஜைகள் நடைபெற்றன. இந்து அமைப்புகள் சார்பில், சுமார் 1,500 விநாயகர் சிலைகள் அமைக்கப்பட்டன.

- 

திண்டுக்கல், நத்தம்/பழனி/ஒட்டன்சத்திரம்/கொடைக்கானல்/தேனி/பெரியகுளம், ஆக. 27: விநாயகர் சதுர்த்தியை முன்னிட்டு, திண்டுக்கல் மாவட்டத்தில் கோயில்களில் புதன்கிழமை சிறப்பு பூஜைகள் நடைபெற்றன. இந்து அமைப்புகள் சார்பில், சுமார் 1,500 விநாயகர் சிலைகள் அமைக்கப்பட்டன.

திண்டுக்கல் ரயிலடி, சித்தி விநாயகர் கோயில், வெள்ளை விநாயகர் கோயில், நன்மை தரும் 108 விநாயகர் கோயில், மடத்து விநாயகர் கோயில் உள்ளிட்ட கோயில்களில் விநாயகர் சதுர்த்தியை முன்னிட்டு, மகா அபிஷேகத்துடன் சிறப்பு பூஜைகள் நடத்தப்பட்டன. இதில் ரயிலடி சித்தி விநாயகருக்கு புதிதாக செய்யப்பட்ட வெள்ளிக் கவசம் அணிவிக்கப்பட்டு, சிறப்பு பூஜைகள் நடைபெற்றன.

இந்து முன்னணி, இந்து மக்கள் கட்சி, இந்து தர்ம சக்தி, விஷ்வ ஹிந்து பரிஷத், சிவசேனை, இந்து சக்தி சங்கம், அகில பாரத இந்து மகா சபா, இந்து தமிழர் கட்சி உள்ளிட்ட அமைப்புகள் சார்பில், மாவட்டத்தின் பல்வேறு பகுதிகளில் சுமார் 1,500 விநாயகர் சிலைகள் நிறுவப்பட்டு, வழிபாடு நடத்தப்பட்டது. விநாயகர் சிலைகள் நிறுவப்பட்ட இடங்களில் போலீஸார் பாதுகாப்புப் பணியில் ஈடுபடுத்தப்பட்டனர்.

நத்தம்: திண்டுக்கல் மாவட்டம், நத்தம் கோவில்பட்டி கைலாசநாதர் கோயில் மகா கணபதி சந்நிதியில் விநாயகர் சதுர்த்தியை முன்னிட்டு, புதன்கிழமை சிறப்பு பூஜைகள் நடைபெற்றன.

விநாயகருக்கு அருகம்புல், ரோஜா, மல்லிகை, முல்லை உள்ளிட்ட பல்வேறு பூ மாலைகள் சாத்தப்பட்டு 16 வகை அபிஷேகம் செய்து, தீபாராதனை நடைபெற்றது. இதில் திரளான பக்தர்கள் கலந்து கொண்டு சுவாமி தரிசனம் செய்தனர். அவர்களுக்கு சர்க்கரைப் பொங்கல், கொழுக்கட்டை பிரசாதங்கள் வழங்கப்பட்டன.

இது போல, நத்தம் மாரியம்மன் கோயில் அருகேயுள்ள லட்சுமி விநாயகர் கோயில், அண்ணாநகர் விநாயகர் கோயில் ஆகியவற்றிலும் சிறப்பு பூஜை நடைபெற்றது. இங்கும் திரளான பக்தர்கள் கலந்து கொண்டு சுவாமி தரிசனம் செய்தனர்.