மதிப்பெண் மட்டுமே அளவுகோலா?

மதிப்பெண்களை இறுதி முடிவாகக் கருதாமல், அவை பல கருவிகளில் ஒரு கருவியாக மட்டுமே பயன்படுத்தப்பட வேண்டும். நேர்காணல்கள், திட்ட அடிப்படையிலான மதிப்பீடுகள், திறன் சோதனைகள் போன்றவற்றை உள்ளடக்கிய ஒரு கலப்பு முறையே இன்றைய தேவை. இதுவே உண்மையான திறமைகளை அடையாளம் காண உதவும்.

- முனைவர் எஸ்.பாலசுப்ரமணியன்

மது நாட்டின் அசைக்க முடியாத பலம் இளைஞர் சக்திதான். இந்த மாபெரும் ஆற்றலை நாட்டின் வளர்ச்சிக்குப் பயன்படுத்த வேண்டுமென்றால், நம் இளைஞர்களின் உண்மையான திறனையும் தகுதியையும் நாம் சரியான முறையில் அடையாளம் காண வேண்டும். ஆனால், அந்த அடையாளம் காணும் முறை இன்று சரிதானா என்ற கேள்வி எழுகிறது.

ஒரு மாணவரின் பல ஆண்டுகால கல்விப் பயணத்தையும், அவர் செய்த கடின உழைப்பையும் அவர் பெற்ற மதிப்பெண் என்ற வெறும் எண்ணாகச் சுருக்கி, அதையே அவர்களின் முழுத் தகுதியாகக் கருதும் போக்கு நிலவுகிறது. இது பல நியாயமான கேள்விகளை எழுப்புகிறது. அரசுப் பணி, தனியார் துறை வாய்ப்புகள், உயர் கல்விக்கான வழிகள் என எதுவாக இருந்தாலும், இன்று மதிப்பெண் மட்டுமே பிரதான வாயிலாக நிற்கிறது. இது உண்மையான தகுதியை மறைத்து, வெறும் எண்களின் மாயத் தோற்றத்தை உருவாக்குகிறது. இந்த நிலை சரியா? இந்தக் கேள்விக்கு நாம் ஆழமாகச் சிந்தித்து விடை காண வேண்டும்.

ஒரு மாணவர் பெறும் மதிப்பெண் என்பது பலவிதமான காரணங்களின் கூட்டு விளைவு. அவற்றில் சில காரணங்கள் மாணவரின் திறமையுடன் தொடர்புடையவை; சில புறக்காரணிகளால் தீர்மானிக்கப்படுபவை. குறிப்பாக, ஒரே பல்கலைக்கழகத்தின்கீழ் வரும் கல்லூரிகளிலேயே, பல்வேறு படிப்புகளுக்கிடையே, பாடத் திட்ட அமைப்புகளும், அதன் அடிப்படையிலான மதிப்பெண் வழங்கும் முறையும் மாறுபடுவது சிந்திக்க வேண்டிய ஒன்றாகும். வெவ்வேறு பொறியியல் பாடப் பிரிவுகளுக்கிடையே மதிப்பெண் வழங்கும் முறையில் வெளிப்படையான வேறுபாடுகளைக் காண முடியும்.

கணினிப் பொறியியல் மற்றும் தகவல் தொழில்நுட்பம் போன்ற தற்கால கல்விப் பிரிவுகளில், செய்முறைத் தேர்வுகளும் எழுத்துத் தேர்வுகளும் இணைந்தே பல பாடங்களின் இறுதி மதிப்பீட்டுக்கு அடிப்படையாகின்றன.