மருத்துவர் சுப்பையா கொலை வழக்கு: டிச.4-க்கு விசாரணை ஒத்திவைப்பு

சென்னையில் மருத்துவர் சுப்பையா படுகொலை செய்யப்பட்ட வழக்கில் குற்றஞ்சாட்டப்பட்ட 9 பேரை விடுவித்து சென்னை உயர்நீதிமன்றம் பிறப்பித்த தீர்ப்புக்கு எதிரான மேல்முறையீட்டு வழக்கின் விசாரணையை டிசம்பர் 4-ஆம் தேதிக்கு உச்சநீதிமன்றம் ஒத்திவைத்துள்ளது.

- நமது நிருபர்

இது தொடர்பான மேல்முறையீட்டு வழக்கின் விசாரணை உச்சநீதிமன்றத்தில் நீதிபதிகள் எம்.எம். சுந்தரேஷ், சதீஷ் சந்திர ஷர்மா அடங்கிய அமர்வு முன்பாக வியாழக்கிழமை நடைபெற்றது.

அப்போது தமிழக அரசு சார்பில் மூத்த வழக்குரைஞர் முகுல் ரோத்தகி ஆஜராகி முன்வைத்த வாதம்: சுப்பையா தாக்கப்பட்ட சம்பவத்தை நேரில் பார்த்த பலர் சாட்சியம் அளித்தனர். அவரைத் தாக்க பயன்படுத்தப்பட்ட கத்தி, ரத்தக்கறை படிந்த பை, சட்டை, குற்றவாளிகள் பயன்படுத்திய வாகனம், அவர்கள் தங்கியிருந்த விடுதி ரசீது, பயணம் செய்த தனியார் பேருந்து டிக்கெட் நகல் போன்றவை கைப்பற்றப்பட்டு விசாரணையில் அவை உறுதிப்படுத்தப்பட்டன.