உழைப்பு...ஓய்வு...உறக்கம்!

தொழிலாளர்களின் அடிப்படை உரிமைகள் காக்கப்பட வேண்டும்; நிலைநாட்டப்பட வேண்டும். சாதாரண தொழிற்சாலைகளில் மட்டுமல்ல, பெரு நிறுவனங்கள் (கார்ப்பரேட் நிறுவனங்கள்) பலவற்றிலும் மனிதாபிமான அணுகுமுறை அற்றுப்போய் கிடக்கிறது.

- த.ஸ்டாலின் குணசேகரன்

ஈரோட்டில் ஒரு மாதத்துக்கு முன்பு ஒரு தொழிலாளி தான் பணியாற்றும் தொழிற்சாலையில் ஒன்பதரை மணிக்கு வேலையைத் தொடங்கினார். பின்னிரவு சுமார் இரண்டரை மணிக்கு தொழிற்சாலையில் வேலை செய்து கொண்டிருக்கும்போது எதிர்பாராதவிதமாக மரணமடைந்தார். இரவுப் பணியில் வேலை செய்த அனைத்துத் தொழிலாளர்களும் செய்வதறியாது பதறினர்.

அகால நேரத்திலும் நிர்வாகத்துக்குத் தகவல் கிடைக்கப் பெற்று தொழிற்சாலையின் நிர்வாகி ஒருவர் அங்கு வந்து சேர்ந்தார். அதற்குள் 108 ஆம்புலன்ஸ் சேவைக்கு தகவல் அளிக்கப்பட்டது. இறப்பை உறுதிசெய்த ஆம்புலன்ஸ் ஊழியர்கள், அந்தத் தொழிலாளி இறந்த பிறகு மருத்துவமனைக்கோ, அவரது வீட்டுக்கோ நாங்கள் எடுத்துச் செல்லக் கூடாது என்றும் அதற்கென்று உள்ள வாகனத்தில் ஏற்றிச் செல்லுமாறும் கூறிவிட்டுச் சென்றுவிட்டனர்.

அதற்குள் குடும்பத்தில் உள்ளவர்களுக்குத் தகவல் கிடைத்து, அலறியடித்துக் கொண்டு தொழிற்சாலைக்கு வந்தனர். தொழிற்சாலை நிர்வாகி வாகனத்தை வரவழைத்து தனது பொறுப்பில் சடலத்தை அந்தத் தொழிலாளியின் வீட்டுக்கு அனுப்பி வைத்தார்.

இரண்டு மூன்று நாள்கள் கழித்து, அந்தத் தொழிலாளியின் மரணத்தையொட்டிச் செய்ய வேண்டிய சடங்குகளுக்கு ஏதேனும் உதவி செய்ய நிர்வாகத்திடம் குடும்பத்தினர் முறையிட்டனர். தொழில் இருக்கும் மோசமான சூழலை நிர்வாகி காரணம் காட்டி, இறந்தவுடன் செலவு செய்து சடலத்தை வீட்டுக்கு அனுப்பியதை உதவியாக எடுத்துரைத்து எதுவும் அளிக்காமல் அவர்களை அனுப்பினார்.

பின்னர் தொழிற்சங்கம் இதில் தலையிட்டு தொழிலாளரின் குடும்பச் சூழல், வறுமை என்று இருக்கிற எல்லாக் காரணங்களையும் நிர்வாகத்திடம் எடுத்துரைத்து, நிர்க்கதியாக நிற்கும் தொழிலாளியின் குடும்பத்துக்கு ஒரு தொகையை நஷ்டஈடாக வழங்குமாறு கோரிக்கை வைத்தது.

அந்தத் தொழிலாளிக்கு வயது 54; மனைவி, இரண்டு மகள்கள் உள்ளனர். சட்டம், மனிதாபிமானம், நடைமுறைப் பழக்கம், குடும்பத்தின் நிலை, நிர்வாகத்தின் கடமை, நீதிமன்றத் தீர்ப்பு என்று அனைத்து விளக்கங்களும் அழுத்தமாகவும் முறையாகவும் சங்கத்தின் சார்பில் எடுத்துரைக்கப்பட்டது.