தாமதமின்றி தமிழகத்துக்கு நிதி

மத்திய அரசுக்கு முதல்வர் மு.க.ஸ்டாலின் வேண்டுகோள்

- 

மத்திய அரசின் சார்பில் தமிழ்நாட்டில் செயல்படுத்தப்படும் திட்டங்களுக்கான நிதியை தாமதமின்றி உடனடியாக விடுவிக்க வேண்டும் என்று மத்திய அரசுக்கு முதல்வர் மு.க.ஸ்டாலின் வேண்டுகோள் விடுத்துள்ளார்.

வளர்ச்சி, ஒருங்கிணைப்பு மற்றும் கண்காணிப்புக் குழுவின் மாநில அளவிலான நான்காவது கூட்டம் தலைமைச் செயலகத்தில் சனிக்கிழமை நடைபெற்றது. அதில் முதல்வர் மு.க.ஸ்டாலின் பேசியதாவது: மத்திய அரசின் ஊரக வளர்ச்சி அமைச்சகத்தால் தமிழ்நாட்டில் செயல்படுத்தப்படும் 67 திட்டங்களைக் கண்காணிக்கவும், அவற்றைச் செயல்படுத்தவும் மாநில அளவிலான வளர்ச்சி, ஒருங்கிணைப்பு மற்றும் கண்காணிப்பு குழுக்கூட்டத்தை நடத்தி வருகிறோம்.

கடந்த முறை நடந்த கூட்டத்தில் அதிமுக உறுப்பினர் கே.ஏ.செங்கோட்டையன் பேசுகையில், தேங்காய் விவசாயிகளுக்கு மிக விரைவாக பணப் பட்டுவாடா செய்ய உரிய நடவடிக்கை எடுக்க வேண்டும் என்றார். அதன்படி நடவடிக்கை எடுக்கப்பட்டுள்ளது.

பிரதமரின் வீடு கட்டும் திட்டத்தின் கீழ் கட்டப்படும் வீட்டுக்கான தொகையை உயர்த்த வேண்டும் என விசிக தலைவர் திருமாவளவன் கோரிக்கை விடுத்திருந்தார். இது தொடர்பான கருத்துரு மத்திய அரசுக்கு அனுப்பி வைக்கப்பட்டுள்ளது.

இப்போதைய கூட்டத்தில், பிரதம மந்திரி கிராம சாலைத் திட்டம், பிரதம மந்திரி ஊரக குடியிருப்புத் திட்டம், தேசிய வேளாண் வளர்ச்சித் திட்டம், துளிநீர் அதிக பயிர், பிரதான் மந்திரி மாத்ரு வந்தனா யோஜனா, மாற்றுத்திறனாளிகளுக்கான தனித்துவம் வாய்ந்த அடையாள அட்டை போன்ற திட்டங்களின் செயல்பாடுகள் ஆய்வுக்கு எடுத்துக்கொள்ளப்பட்டுள்ளன.