காலிறுதியில் மோதும் அல்கராஸ் - ஜோகோவிச்

ஆஸ்திரேலிய ஓபன் டென்னிஸ் போட்டியில், முன்னணி வீரர்களான ஸ்பெயினின் கார்லோஸ் அல்கராஸ், செர்பியாவின் நோவக் ஜோகோவிச் ஆகியோர் காலிறுதிச் சுற்றில் மோதவுள்ளனர்.

- 

மெல்போர்ன், ஜன. 19:

ஆண்டின் முதல் கிராண்ட்ஸ்லாம் டென்னிஸ் போட்டியான ஆஸ்திரேலிய ஓபன், மெல்போர்ன் நகரில் நடைபெற்று வருகிறது. இதில் 4-ஆவது சுற்று ஆட்டங்கள் ஞாயிற்றுக்கிழமை நடைபெற்றன.

ஆடவர் ஒற்றையர் பிரிவில், உலகின் 3-ஆம் நிலை வீரராக இருக்கும் அல்கராஸ், போட்டித்தரவரிசையில் 15-ஆம் இடத்திலிருந்த பிரிட்டனின் ஜேக் டிரேப்பரை சந்தித்தார்.

இதில் அல்கராஸ் முதலிரண்டு செட்களையும் 7-5, 6-1 என கைப்பற்றி முன்னிலையில் இருந்த போது, டிரேப்பர் இடுப்புப் பகுதி காயம் காரணமாக போட்டியிலிருந்து விலகினார்.

இதனால் அல்கராஸ் காலிறுதிக்கு முன்னேறியதாக அறிவிக்கப்பட்டது.

மற்றொரு ஆட்டத்தில், உலகின் 7-ஆம் நிலையில் இருக்கும் ஜோகோவிச் 6-3, 6-4, 7-6 (7/4) என்ற செட்களில், போட்டித்தரவரிசையில் 24-ஆம் இடத்திலிருந்த செக் குடியரசின் ஜிரி லெஹெக்காவை தோற்கடித்தார்.

உலகின் 2-ஆம் நிலையில் இருக்கும் ஜெர்மனியின் அலெக்ஸாண்டர் ஸ்வெரெவ் 6-1, 2-6, 6-3, 6-2 என்ற கணக்கில், போட்டித்தரவரிசையில் 14-ஆம் இடத்திலிருந்த பிரான்ஸின் யூகோ ஹம்பர்டை வெளியேற்றினார்.

12-ஆம் இடத்திலிருக்கும் அமெரிக்காவின் டாமி பால், 6-1, 6-1, 6-1 என்ற கணக்கில் மிக எளிதாக, ஸ்பெயினின் அலெக்ஸாண்ட்ரோ டேவிடோவிச்சை சாய்த்து காலிறுதிக்கு வந்துள்ளார். இதையடுத்து காலிறுதியில், அல்கராஸ் - ஜோகோவிச், ஸ்வெரெவ் - டாமி பால் மோதுகின்றனர்.

அல்கராஸ் - ஜோகோவிச் சந்தித்துக்கொள்வது இது 8-ஆவது முறையாகும்.