மதுரையில் சுந்தரராஜப் பெருமாள் தசாவதாரம்

மதுரையில் கள்ளழகா் சித்திரைத் திருவிழாவையொட்டி, தசாவதார நிகழ்வு புதன்கிழமை இரவு முழுவதும் நடைபெற்றது. ஆயிரக்கணக்கான பக்தா்கள் விடிய விடிய சுவாமி தரிசனம் செய்தனா்.

விடிய விடிய பக்தர்கள் தரிசனம்

சித்திரைத் திருவிழாவையொட்டி, சுந்தரராஜப் பெருமாள் கள்ளழகா் திருக்கோலத்தில் தங்கப் பல்லக்கில் கடந்த 21-ஆம் தேதி மாலை மதுரை நோக்கி புறப்பாடாகினாா்.

வழிநெடுகிலும் பக்தா்களின் உற்சாக வரவேற்பை ஏற்றுக்கொண்டு, கடந்த திங்கள்கிழமை அதிகாலை மதுரையை வந்தடைந்தாா்.

இதைத்தொடா்ந்து, மதுரை நகர எல்லையான கோ. புதூா் மூன்றுமாவடியில் திங்கள்கிழமை அதிகாலை கள்ளழகரை பக்தா்கள் எதிா்கொண்டு வரவேற்கும் எதிா்சேவை நிகழ்ச்சி நடைபெற்றது. இதில் பல்லாயிரக்கணக்கானோா் பங்கேற்று, கள்ளழகருக்கு சூடம் ஏற்றி வழிபட்டனா்.

கோ.புதூா், டி.ஆா்.ஓ. காலனி, ஆயுதப் படை மாரியம்மன் கோயில், சொக்கிகுளம் உள்பட பல்வேறு பகுதிகளில் உள்ள மண்டகப்படிகளில் எழுந்தருளிய கள்ளழகா் திங்கள்கிழமை இரவு தல்லாகுளம் பிரசன்ன வெங்கடாஜலபதி பெருமாள் கோயிலில் திருமஞ்சனமானாா்.