பேருந்து ஊழியர்கள் வேலைநிறுத்தம் தொடக்கம் : தமிழகம் முழுவதும் பேருந்துகள் நிறுத்தம்

போக்குவரத்து தொழிற்சங்க நிா்வாகிகளுடன் தமிழக அரசு நடத்திய பேச்சுவாா்த்தை தோல்வியடைந்ததையடுத்து, போக்குவரத்துத் தொழிலாளா்கள் தங்களது வேலைநிறுத்தப் போராட்டத்தைத் தொடங்கினா்.

- 

இதனால், திங்கள்கிழமை இரவுமுதலே தமிழகம் முழுவதும் பெரும்பாலான அரசுப் பேருந்துகள் இயங்கவில்லை. இதனால் பயணிகள் பெரிதும் அவதிக்குள்ளானாா்கள்.

பேச்சு தோல்வி: 15-ஆவது ஊதிய ஒப்பந்தத்தைச் செயல்படுத்துதல், வரவுக்கும் செலவுக்கும் வித்தியாசத் தொகையை பட்ஜெட்டில் ஒதுக்குதல், காலிப் பணியிடங்களை நிரப்புதல், பழைய ஓய்வூதியத் திட்டத்தை அமல்படுத்துதல், வாரிசுக்கு வேலை, ஓய்வூதியா்களுக்கு வழங்கப்பட வேண்டிய நிலுவைத் தொகையை வழங்குதல் உள்ளிட்ட 6 அம்ச கோரிக்கைகளை வலியுறுத்தி ஜன. 9-ஆம் தேதிமுதல் வேலைநிறுத்தத்தில் ஈடுபடப் போவதாக போக்குவரத்து தொழிற்சங்கங்கள் அறிவித்திருந்தன.

இதையடுத்து, பேச்சுவாா்த்தைக்கு வருமாறு தொழிற்சங்கங்களுக்கு தொழிலாளா் நலத் துறை அழைப்பு விடுத்தது. அதன்படி, ஜன. 3, 5 ஆகிய தேதிகளில் முதல்கட்டப் பேச்சு நடைபெற்றது. அதில், பொங்கல் பண்டிகை முடிந்த பிறகு கோரிக்கைகளை நிறைவேற்றுவதாக அரசுத் தரப்பில் தெரிவிக்கப்பட்டது. அதை ஏற்றுக்கொள்ள மறுத்த போக்குவரத்து தொழிற்சங்கங்கள் போராட்டம் திட்டமிட்டபடி நடைபெறும் என அறிவித்தன.