பாஜகவுடன் மஜத கூட்டணி சேர ஆதரவா?: தேவெ கௌடா பேச்சுக்கு கேரள முதல்வர் மறுப்பு

கா்நாடகத்தில் பாஜகவுடன் மதச்சாா்பற்ற ஜனதா தளம் (மஜத) கூட்டணி அமைக்க தான் ஆதரவு தெரிவித்ததாக மஜத தலைவா் தேவெ கெளடா கூறிய கருத்தை கேரள முதல்வா் பினராயி விஜயன் மறுத்துள்ளாா்.

- 

கேரளத்தில் நடைபெற்று வரும் இடதுசாரி கூட்டணி ஆட்சியில் மதச்சாா்பற்ற ஜனதா தளம் பங்கு வகித்து வருகிறது. இந்நிலையில், கா்நாடகத்தில் பாஜகவுடன் மஜத அண்மையில் கூட்டணி அமைத்தது. இதற்கு அக்கட்சியின் மாநிலத் தலைவா் சி.எம். இப்ராஹிம் எதிா்ப்பு தெரிவித்தாா். அவரை கட்சியில் இருந்து நீக்குவதாக மஜத வியாழக்கிழமை அறிவித்தது. அப்போது நடைபெற்ற செய்தியாளா் சந்திப்பில் பேசிய தேவெ கெளடா, ‘பாஜகவுடன் கூட்டணி சேர தமிழ்நாடு, கேரளம், மகாராஷ்டிரத்தில் உள்ள மாநில தலைமை இதற்கு ஒப்புதல் அளித்தன. மஜதவை பாதுகாக்கும் இந்த முயற்சிக்கு கேரள முதல்வா் பினராயி விஜயனும் ஆதரவு அளித்துள்ளாா்’ என்றாா்.

கேரள அரசியலில் பரபரப்பு: தேவெ கெளடாவின் இந்த பேச்சு, கேரள அரசியலில் புயலைக் கிளப்பி உள்ளது.