‘સુડલઃ ધ વોર્ટેક્સ' સિરીઝ કેમ જોવી જોઈએ?

મૂળ તમિળમાં બનેલી અને અઢળક ભાષામાં ડબ્ડ થયેલી આ સિરીઝ બિન્જ વૉચ થઈ રહી છે અને આખી એકીસાથે જોયા પછી ઘણા લોકોને તે એવરેજથી થોડી સારી (અબોવ એવરેજ) લાગી રહી છે. તેનું કારણ અહીં રજૂ કર્યું છે. ‘સુડલઃ ધ વૉર્ટેક્સ’માં ઉઠાવાયેલા સામાજિક મુદ્દા વિશે અહીં સ્પૉઇલરયુક્ત વાતો કરી છે.

- પાર્થ દવે

દમદાર સિરીઝનું સૌથી મોટું લક્ષણ તેનો કન્વિન્સિંગ અને એન્ગેજિંગ પાવર હોય છે અને દર્શકોને કન્વિન્સ કરવામાં દક્ષિણ ભારતના મેકર્સને કોઈ ન પહોંચે. દા.ત. આરઆરઆર, કેજીએફ અને પુષ્પા. એમેઝોન પ્રાઇમ પર રિલીઝ થયેલી ‘ સુડલઃ ધ વોર્ટેક્સ’ એવી જ એક સિરીઝ છે. ‘ સુડલ’ તમિળ શબ્દ છે જેનો અર્થ થાય વોર્ટેક્સ. એટલે કે ઘૂમરી. સિરીઝનાં પાત્રો તો ઘૂમરીમાં ફસાય જ છે, દર્શકો પણ ક્રમશઃ ફસાતા જાય છે. ‘ સુડલ’ તેના પહેલા એપિસોડના અંતથી સ્ક્રીન સામે બેઠેલા દર્શકને રીતસરનો ખેંચી લે છે.

તામિલનાડુનું સેમ્બલૂર નામનું એક કાલ્પનિક નાનું ગામ છે. એટલું અને એવું નાનું કે ગામના તમામ લોકો એકબીજાને ઓળખે છે. ગામમાં એક ફેક્ટરી છે. તેમાં કામ કરનારા લોકો પણ ત્યાં જ રહે છે. ફેક્ટરીના માલિક અને મજૂરો વચ્ચે માથાકૂટ થાય છે. મજૂર-યુનિયનનો લીડર શનમુગમ (આર. પાર્થીબન) છે. તે જ રાત્રે ફેક્ટરીમાં આગ લાગે છે. શંકાની સોય શનમુગમ ઉપર જ તકાય છે. સબ ઇન્સ્પેક્ટર સકરૈ અને ઇન્સ્પેક્ટર રેગિના, બિનસત્તાવાર રીતે (અને ઇચ્છા ન હોવા છતાં) ફેક્ટરીના માલિક ત્રિલોક વધુ માટે કામ કરતા હોય છે જે મજૂરોને નથી ગમતું. ફેક્ટરીમાં આગ લાગી તે જ દિવસે શનમુગમની દીકરી નીલા ગાયબ થઈ જાય છે. આ બધું થાય છે ત્યારે ગામમાં ‘મય્યાન કોલ્લઈ' નામના ઉત્સવનો પહેલો દિવસ હોય છે. ‘મય્યાન કોલ્લઈ' શબ્દનો અર્થ થાય કબ્રસ્તાનને લૂંટવા. તેમાં રથ ઉપર દેવી અંગલા પરમેશ્વરીને લઈ જવામાં આવે છે. આ તહેવાર ‘સુડલઃ ધ વોર્ટેક્સ’ સિરીઝનું મુખ્ય એલિમેન્ટ છે. સિનેમેટોગ્રાફર મુકેશ્વરણે ‘મય્યાન કોલ્લઈ' ઉત્સવને બખૂબી રીતે કંડાર્યું છે. અમુક જગ્યાને બાદ કરતાં તે દ્રશ્યો જોવા ગમે છે. તે ઉત્સવનુમા દ્રશ્યો વાર્તાને આગળ વધારે છે અને સાથે તે ઉત્સવમાં પહેરાતી વેશભૂષા, રંગ, છટા, શણગાર, દેવી, ભભૂત વગેરે દર્શાવાય છે.