323 கொள்கலன்கள் விடுவிக்கப்பட்டதில் எந்த அரசியல் தலையீடும் கிடையாது

323 கொள்கலன்கள் விடுவிப்பில் எந்த அரசியல் தலையீடும் கிடையாது என மீண்டும் மறுத்துள்ள அரசு, சமூக வலைத்தளங்களில் பரிமாற்றப்படும் அறிக்கையையே பிரதி அமைச்சர் அனில் ஜயந்த பெர்னாண்டோ எதிர்க்கட்சி உறுப்பினர் சபைக்கு சமர்ப்பித்தார். ஜனாதிபதிக்கு சமர்ப்பிக்கப்பட்டுள்ள அறிக்கை வெகுவிரைவில் சபைக்கு சமர்ப்பிக்கப்படும் எனவும் அறிவித்தது.

- பா. கிருபாகரன் - ந. ஜெயகாந்தன்

பாராளுமன்றத்தில் நேற்று செவ்வாய்க்கிழமை 323 கொள்கலன்கள் விடுவிப்பு தொடர்பில் 2%/2 இன் கீழ் எதிர்க்கட்சித் தலைவர் சஜித் பிரேமதாச முன்வைத்த கேள்விகளுக்கு பொருளாதார அபிவிருத்தி திட்டமிடல் பிரதி அமைச்சர் அனில் ஜயந்த பெர்னாண்டோ பதிலளிக்கும்போதே இவ்வாறு தெரிவித்ததுடன் மேலும் கூறுகையில்,

கடந்த ஜனவரி மாதம் சுங்கத்தில் இருந்து கொள்கலன்களை விடுவிக்கும் போது ஏற்பட்ட நெரிசலுக்கு தீர்வு காண்பதற்கு சுங்கத் திணைக்களத்துக்கு தேவையான வசதிகள் நிதியமைச்சினால் ஏற்படுத்திக் கொடுக்கப்பட்டன. சுயாதீனமான முறையில் தீர்மானங்கள் எடுப்பதற்கு முழுமையாக அதிகாரமளிக்கப்பட்டது.

இவ்வாறான பின்னணியில் பரிசோதனைகள் ஏதுமின்றி சுங்கத்தில் இருந்து 323 கொள்கலன்கள் விடுவிக்கப்பட்டதாக எதிர்க்கட்சியினர் குற்றம்சாட்டுகின்றனர். இவ்விடயத்தின் உண்மையை ஆராய்வதற்கு 2025.01.30 ஆம் திகதியன்று ஜனாதிபதியின் பணிப்புக்கு அமைய நிதியமைச்சின் செயலாளர் ஐந்து உறுப்பினர்களை உள்ளடக்கிய வகையில் குழு ஒன்றை நியமித்தார்.

அரசியல் தலையீட்டுடன் இந்த 323 கொள்கலன்கள் பரிசோதனையின்றி விடுவிக்கப்பட்டுள்ளதாக எதிர்க்கட்சியினர் முன்வைக்கும் குற்றச்சாட்டை ஏற்க முடியாது. இந்த கொள்கலன்கள் விடுவிப்பில் ஏதேனும் முறைகேடுகள் இடம்பெற்றிருக்குமானால் அதற்குரிய நடவடிக்கைகளை உரிய முறையில் முன்னெடுப்போம்.

ஜனாதிபதியின் செயலாளரால் நியமிக்கப்பட்ட குழுவின் அறிக்கை ஜனாதிபதிக்கு கையளிக்கப்பட்டுள்ளது. சமூக வலைத்தளங்களில் பரிமாற்றப்படும் அறிக்கையின் பிரதியையே எதிர்க்கட்சியின் உறுப்பினர் சபைக்கு சமர்ப்பித்தார். ஆனால் நாங்கள் ஜனாதிபதிக்கு கையளித்த அறிக்கையை பாராளுமன்றத்துக்கு வெகுவிரைவில் சமர்ப்பிப்போம் என்றார்.

சோதனை இல்லாமல்.....

முன் பக்கத் தொடர்ச்சி