கல்விக்காக குடியிருந்த வீட்டையும் கொடுத்தவர் வள்ளல் அழகப்பர்

அமைச்சர் அன்பில் மகேஷ் புகழாரம்

- 

காரைக்குடி, ஆக. 2: கல்விக்காக தான் குடியிருந்த வீட்டையும் கொடுத்தவர் வள்ளல் அழகப்பர் என்று தமிழக பள்ளிக்கல்வித்துறை அமைச்சர் அன்பில் மகேஷ் பொய்யாமொழி புகழாரம் சூட்டினார்.

சிவகங்கை மாவட்டம், காரைக்குடி அழகப்பா பல்கலைக்கழக நிர்வாகத்தின் கீழ் உள்ள அழகப்பா மாதிரி மேல்நிலைப் பள்ளியின் 75-ஆம் ஆண்டு பவள விழா சனிக்கிழமை நடைபெற்றது. விழாவில் பவள விழா மலரை வெளியிட்டு அமைச்சர் அன்பில் மகேஷ் பேசியதாவது:

இந்தப் பள்ளி பல்வேறு ஆளுமைகளை உருவாக்கித் தந்துள்ளது. ஏழு வள்ளல்களைத் தாண்டி 8-வது வள்ளலாக அழகப்பர் இடம் பெறுகிறார். கல்விக்காகத்தான் குடியிருந்த வீட்டையும் கொடுத்தவர் அவர். அரசுப் பள்ளிகளுக்கு வழங்கப்படும் 7.5 சதவீத இட ஒதுக்கீடு அழகப்பா மாதிரி மேல்நிலைப் பள்ளிக்கு வழங்க வேண்டும் என்று பல்வேறு தரப்பினர் கோரிக்கை விடுத்தனர். இது தொடர்பாக வருகிற 8-ஆம் தேதி நடைபெறவிருக்கும் கூட்டத்தில் தமிழக முதல்வரிடம் எடுத்துக் கூறுகிறேன். இதில் நல்ல முடிவு கிடைக்கும் என்று நம்புகிறேன்.