மாவட்ட வாரியாக அரசுப் பள்ளிகளுக்கு விருது

பள்ளிக் கல்வித் துறை சார்பில் சுழற்கேடயங்கள் வழங்கும் வகையில் மாவட்ட வாரியாக சிறந்த மூன்று அரசுப் பள்ளிகளைத் தேர்வு செய்து பட்டியல் அனுப்புமாறு மாவட்டக் கல்வி அலுவலர்களுக்கு தொடக்கக் கல்வித் துறை உத்தரவிட்டுள்ளது.

- 

சென்னை, மே 25:

பள்ளிக் கல்வித் துறையில் அரசு மற்றும் அரசு உதவி பெறும் தொடக்க, நடுநிலைப் பள்ளிகளில் கல்விப் பணியில் முன்னேற்றம் காணும் வகையிலும், பள்ளிகளிடையே போட்டி மனப்பான்மையை ஊக்குவிக்கும் வகையிலும் ஆண்டுதோறும் மாவட்டத்திலுள்ள மூன்று சிறந்த பள்ளிகளைத் தேர்வு செய்து மாவட்ட வாரியாக சுழற்கேடயங்கள் வழங்கப்பட்டு வருகின்றன.

அந்த வகையில் 2023-2024-ஆம் ஆண்டுக்கான சிறந்த பள்ளிகளுக்கு 114 கேடயங்களை பள்ளிக் கல்வித் துறை அமைச்சர் அன்பில் மகேஸ் அவற்றின் தலைமை ஆசிரியர்களிடம் கடந்த ஆண்டு நவ. 14-இல் சென்னையில் நடைபெற்ற விழாவில் வழங்கினார்.