மாநிலங்களுக்கு 50% வரிப் பகிர்வு தேவை

மத்திய அரசின் வருவாயில் மாநிலங்களுக்கான வரிப் பகிர்வு 50 சதவீதமாக உயர்த்தப்பட வேண்டும் என தில்லியில் சனிக்கிழமை நடைபெற்ற நீதி ஆயோக் கூட்டத்தில் முதல்வர் மு.க.ஸ்டாலின் வலியுறுத்தினார்.

- நமது சிறப்பு நிருபர்

நமது சிறப்பு நிருபர் புது தில்லி, மே 24:

ஒரு மாநிலத்துக்கு கிடைக்க வேண்டிய நிதியை வழக்காடிப் பெற வேண்டிய நிலைமையில் இருப்பதும் கூட்டாட்சிக்கு சிறப்பு அல்ல எனவும் அவர் தெரிவித்தார்.

தில்லி, பாரத் மண்டபத்தில் பிரதமர் நரேந்திர மோடி தலைமையில் நடைபெற்ற நீதி ஆயோக்கின் 10 -ஆவது நிர்வாகக் குழு கூட்டத்தில் முதல்வர் மு.க.ஸ்டாலின் பங்கேற்றுப் பேசியதாவது:

சமீபத்தில் எல்லையில் பதற்றம் நிலவியபோது நமது ராணுவ வீரர்களுக்கு ஆதரவாக சென்னை யில் பேரணி நடத்தி, நாட்டின் ஒற்றுமை தமிழகம் சார்பில் வெளிப்படுத்தப்பட்டது.

தமிழகத்தின் வளர்ச்சிக் குறிகோள் என்பது, சமத்துவம், சமூக நீதி அடிப்படையில், அனைவரையும் உள்ளடக்கிய, நீடித்த பொருளாதார வளர்ச்சி. இதற்கு பெயர் தான் திராவிட மாடல்.

தமிழகத்தில் 2030-ஆம் ஆண்டுக்குள் ஒரு டிரில்லியன் டாலரும், 2047-இல் 4.5 டிரில்லியன் டாலர் பொருளாதார வளர்ச்சியையும் எட்ட இலக்கு நிர்ணயிக்கப்பட்டுள்ளது. நாட்டுக்கு பிரதமர் உறுதி கொடுத்துள்ள 30 டிரில்லியன் டாலர் வளர்ச்சி இலக்கில் தமிழகத்தின் பங்கு வலுவாக இருக்கும். அதுதான் தற்போது தமிழகத்தில் புள்ளிவிவரங்களாக, வளர்ச்சிக் குறியீடுகளாக எதிரொலிக்கிறது.

ஆண்டுக்கு 8 சதவீதத்துக்கு மேலான வளர்ச்சியும், கடந்த ஆண்டு 9.69 சதவீத வளர்ச்சியையும் தமிழகம் கண்டது.