டெஸ்ட்: சொந்த மண்ணில் சறுக்கும் இந்தியா

சொந்த மண்ணில் மீண்டும் ஒரு சறுக்கலைச் சந்தித்திருக்கிறது இந்திய அணி. தென்னாப்பிரிக்காவுக்கு எதிரான டெஸ்ட் தொடரை 0-2 என முழுமையாக இழந்து, கடுமையான விமர்சனங்களுக்கு உள்ளாகியிருக்கிறது.

- நாதன் நடராஜன்

25 ஆண்டுகளில் முதல் முறையாக, சொந்த மண்ணில் டெஸ்ட் தொடரை முழுமையாக (0-3) நியூஸிலாந்திடம் கடந்த ஆண்டு நவம்பரில் இழந்தது இந்தியா. சரியாக ஓராண்டிலேயே, மீண்டும் அதே போன்ற முழுமையான தோல்வியை தற்போது தென்னாப்பிரிக்காவிடம் சந்தித்திருக்கிறது. இந்தியா தனது மண்ணிலேயே ஒரு டெஸ்ட் தொடரை முழுமையாக இழந்தது இது 3-ஆவது முறை.

இந்தத் தொடரில் தென்னாப்பிரிக்கா வென்றது என்பதை விட, இந்தியா தானாகவே தோல்வியை நோக்கி சறுக்கியது என்றால் பொருத்தமாக இருக்கும். தொடரை முழுமையாக வெல்வோம் என எதிர்பார்க்கவில்லை என்று தென்னாப்பிரிக்க கேப்டன் பவுமா கூறும் அளவுக்கு, சவாலே இல்லாமல் தொடரை தென்னாப்பிரிக்காவுக்கு வாரிக் கொடுத்திருக்கிறது இந்திய அணி.

சர்வதேச களத்தில் சவால் மிக்கதாக இருக்கும் ஆஸ்திரேலியா, இங்கிலாந்து உள்பட எந்த அணியாக இருந்தாலும், இந்தியாவை அதன் மண்ணிலேயே டெஸ்ட் தொடரில் சந்திக்கும்போது தடுமாறிப் போனதுதான் வரலாறு. 'ஒயிட்வாஷ்' என்ற முழுமையான வெற்றி மூலமாக, அந்த அணிகளையுமே இந்தியா அடக்கியாண்டதுண்டு.

அவற்றில் எல்லாம் இந்தியாவின் பிரம்மாஸ்திரம், 'ரேங்க் டர்னர்கள்' எனப்படும் சுழற்பந்துவீச்சுக்கு சாதகமான ஆடுகளங்கள்தான். எனவே, சொந்த மண்ணில் இந்தியாவின் டெஸ்ட் வெற்றிகளில் சுழற்பந்துவீச்சாளர்கள் முக்கியமாக இருந்திருக்கின்றனர்.

தென்னாப்பிரிக்க தொடரில் நிகழ்ந்ததும் அதுதான். ஆனால், வெற்றியின் பக்கம் தென்னாப்பிரிக்காவும், அதைப் பெற்றுத் தந்தவர்களாக அதன் சுழற்பந்துவீச்சாளர்களும் இருந்ததுதான் வித்தியாசம். 'எதிரியின் ஆயுதத்தைக் கொண்டே திருப்பி அடிப்பது' என்பதை இந்தத் தொடரில் தென்னாப்பிரிக்கா செய்து காட்டிவிட்டது.

தடுமாறிய பேட்டர்கள்: