யோகா - வாழ்வியல் நெறி!

பாரத நாட்டிலுள்ள ஆறு தத்துவ தரிசனங்களில் ஒன்றாக யோகமானது திகழ்கிறது.

- 

பண்டைக் காலத்திலிருந்தே முனிவர்களும், சித்தர்களும், தவசீலர்களும், யோகிகளும், ஞானிகளும், தன்னை உணர்ந்தோரும் மனிதகுலத்தின் மீது அளப்பரும் அன்பும் இரக்கமும் பரிவும் கொண்டு மனித வாழ்க்கையின் குறிக்கோளை மிக நுட்பமாக அறிந்து உணர்ந்து, அந்த முக்தியை அடைவதற்கு உரிய பல அரிய நெறிமுறைகளை அருளினர். மனிதன் முக்தி அடைவதற்கு உடல் நலமும் மனநலமும் இன்றியமையாதவை. மனிதன் தன் உண்மையான இயல்பை உணர்ந்து, முக்தியை அடைய உடல், மன நலத்துடன் வாழ்ந்து உண்மையான உயர்ந்த இன்பத்தை அடையும் வழிகளைத் திருமூலர் திருமந்திரத்தில் மனிதகுலத்துக்கு வழங்கியுள்ளார். திருமூலரின் திருமந்திரமானது, பன்னிரு சைவத் திருமுறைகளின் பத்தாம் திருமுறையாக அமைந்துள்ளது. திருமூலர் அறுபத்து மூன்று மெய்யடியார்களில் ஒருவர் ஆவார். இவர் அட்டமாசித்திகளில் தேர்ந்த ஞானயோகி ஆவார்.

யோகம் என்னும் சொல்லுக்கு இணைதல், சேர்தல், ஒருமுனைப்பாடு எனப் பல பொருள்கள் உள்ளன. நம் உடல், மனம், மூச்சு, அறிவு என்னும் இவ்வனைத்தும் ஒருங்கிணைந்து செயலாற்றுவதுதான் உண்மையான யோகமாகும். திருமந்திரத்தில் மூன்றாம் தந்திரத்தில் அட்டாங்க யோகம் குறித்து விவரித்துள்ளார். யோகத்தின் எட்டு அங்கங்களான இயமம், நியமம், ஆசனம், பிராணாயாமம், பிரத்தியாஹாரம், தாரணம், தியானம், சமாதி என்னும் இவற்றைக்குறித்து ஆழமாக விளக்கியுள்ளார்.