தூக்கம் நம் கண்களைத் தழுவட்டுமே...

பாறப்புறத் இராதாகிருஷ்ணன்

- 

ஒருவரின் இயல்பான உடல்நலத்திற்கும், மனநலத்திற்கும் சரியான தூக்கம் மிகவும் அவசியம். தூக்கத்தின்போது, உடல் தசைகள், நரம்பு மண்டலம், மூளை ஆகியவை ஓய்வெடுக்கும். இதனால், நினைவுத்திறன் மேம்படும், நோய் எதிர்ப்பு சக்தி அதிகரிக்கும். உடல்வலி, வீக்கம், உள்ளிட்டவையும் குறையும். உடல் வெப்பம் தணிந்து, உடல் புத்துணர்ச்சி பெறும். தூக்கத்தின்போது சுவாசம் மற்றும் எண்ணவோட்டங்கள் சீராவதுடன், அடுத்தநாள் அன்றாடப் பணிகளைச் செய்ய உடல் ஆயத்தமாகும். உணவு மற்றும் உடற்பயிற்சியைப் போலவே தூக்கமும் உடல்நலத்திற்கு இன்றியமையாதது.

ஆரோக்கியமான ஒருவர் குறைந்தது ஏழு முதல் எட்டு மணி நேரம் வரை தூங்க வேண்டும். அறிவியல் தொழில்நுட்ப மாற்றங்கள், நாடுகளிடையே நேர மாற்றங்கள், வணிகப் பொருளாதார மாற்றங்கள், வேலைவாய்ப்புகளில் ஏற்படும் மாற்றங்கள், காலநிலை மாற்றங்கள் ஆகியவை தூங்கும் நேரங்களிலும் மாற்றங்களைக் கொண்டுவந்துவிட்டன. இதனால், பலர் தூக்கத்தை இழந்து துன்படுகிறார்கள்.

வாழ்க்கை என்பது நேரத்திலானது. பணியாற்றுவதற்கு ஒரு நேரம், உண்பதற்கு ஒரு நேரம், ஓய்வெடுப்பதற்கு ஒரு நேரம், பொழுதுபோக்குவதற்கு ஒரு நேரம் என்பது நாடுகளின் தட்பவெப்ப நிலைகளுக்கேற்ப இயற்கையால் விதிக்கப்பட்ட ஒன்று. இது நாடுகளுக்கு நாடு வேறுபடும். இதை நாம் பின்பற்றாதபோதுதான் உடலின் இயக்கத்தில் பல மாற்றங்கள் ஏற்பட்டு, நோய்களுக்குப் பாதை இட்டுக்கொடுக்கின்றன.