செயற்கை நுண்ணறிவு: ரூ.11,900 கோடி முதலீட்டுடன் 10-ஆவது இடத்தில் இந்தியா

ஐ.நா. அறிக்கையில் தகவல்

- 

நியூ யார்க், ஏப். 5: செயற்கை நுண்ணறிவு (ஏஐ) தொழில்நுட்பத்தில் ரூ.11,900 கோடி தனியார் முதலீட்டுடன் உலகளவில் 10-ஆவது இடத்தில் இந்தியா உள்ளதாக ஐ.நா. வெளியிட்ட அறிக்கையில் தெரிவிக்கப்பட்டது.

2025- தொழில்நுட்பம் மற்றும் புதிய கண்டுபிடிப்புகள்' எனும் தலைப்பிலான அறிக்கையை ஐ.நா. வர்த்தக மற்றும் மேம்பாடு அமைப்பு வெளியிட்டது.

அதில் தொழில்நுட்பம் சார்ந்த பல்வேறு வகைப்பாடுகளின்கீழ் நாடுகள் பட்டியலிடப்பட்டுள்ளன.

அந்த அறிக்கையில் கூறப்பட்டிருப்பதாவது: ஏஐ போன்ற நவீன தொழில்நுட்பங்களுக்கான தயார்நிலை குறியீட்டில் 170 நாடுகளில் இந்தியா 36-ஆவது இடத்தில் உள்ளது. கடந்த 2022-இல் இந்த குறியீட்டில் 48-ஆவது இடத்தில் இருந்த இந்தியா தற்போது முன்னேற்றம் கண்டுள்ளது.

அதேபோல் தகவல் மற்றும் தொலைத்தொடர்பு துறையில் 99-ஆவது இடத்திலும், திறன் சார்ந்த வகைப்பாட்டில் 113-ஆவது இடத்திலும் ஆய்வு மற்றும் மேம்பாட்டில் 3-ஆவது இடத்திலும், தொழில்துறை திறனில் 10-ஆவது இடத்திலும், நிதியில் 70-ஆவது இடத்திலும் இந்தியா உள்ளது.

மனித மூலதனத்தில் வளர்ச்சி: இந்தியா, பூடான், மொராக்கோ, மால்டோவா, திமோர்-லெஸ்தே ஆகிய நாடுகள் மனித மூலதன தர வரிசையில் முன்னேறியுள்ளன.

கல்வி மற்றும் வேலைவாய்ப்பில் திறன் அடிப்படையில் பணிபுரிவோரின் எண்ணிக்கை உயர்ந்ததே இதற்கு காரணமாகும்.

ஏஐ சந்தை மதிப்பு ரூ.409 லட்சம் கோடி: இந்தியா, சீனா, ஜெர்மனி, பிரிட்டன், அமெரிக்கா ஆகிய நாடுகள் ஏஐ துறையில் அறிவியல்பூர்வமான வலிமையை பெற்றுள்ளன.