தெலங்கானா அமைச்சராக முகமது அசாருதீன் பதவியேற்பு

இந்திய கிரிக்கெட் அணியின் முன்னாள் கேப்டன் முகமது அசாருதீன் தெலங்கானா மாநில அமைச்சராக வெள்ளிக்கிழமை பதவியேற்றார்.

- 

ஹைதராபாதில் உள்ள ஆளுநர் மாளிகையில் நடைபெற்ற எளிய நிகழ்ச்சியில் ஆளுநர் ஜிஷ்ணு தேவ் வர்மா அவருக்கு பதவிப் பிரமாணம் செய்து வைத்தார். முதல்வர் ரேவந்த் ரெட்டி உள்ளிட்ட முக்கிய காங்கிரஸ் தலைவர்கள் நிகழ்ச்சியில் பங்கேற்றனர். இதன்மூலம் தெலங்கானா அமைச்சரவையின் பலம் 16-ஆக அதிகரித்துள்ளது.

கடந்த ஆகஸ்ட் மாத இறுதியில் ஆளுநர் ஒதுக்கீட்டில் அசாருதீனை சட்ட மேலவை உறுப்பினராக்க (எம்எல்சி) தெலங்கானா அரசு பரிந்துரைத்தது. ஆனால், நியமனத்துக்கு ஆளுநர் இதுவரை ஒப்புதல் அளிக்காத நிலையில் அசாருதீன் அமைச்சராகியுள்ளார்.

தெலங்கானாவில் முதல்வர் ரேவந்த் ரெட்டி தலைமையிலான காங்கிரஸ் அமைச்சரவையில் சிறுபான்மை பிரிவைச் சேர்ந்த அமைச்சர்கள் யாரும் இதுவரை இல்லாத நிலையில், காங்கிரஸ் தேசிய தலைமையின் பரிந்துரையில் அசாருதீன் அமைச்சராக்கப்பட்டுள்ளார்.

'அமைச்சரானது மகிழ்ச்சி':

பதவியேற்புக்குப் பிறகு செய்தியாளர்களிடம் பேசிய அசாருதீன், 'மிகவும் மகிழ்ச்சியாக இருக்கிறேன். அமைச்சரவையில் எந்தப் பொறுப்பு அளித்தாலும் முழுமூச்சுடன் பணியாற்றுவேன்' என்றார்.