போர் அல்ல; எச்சரிக்கை!

பாகிஸ்தானுக்கு எதிரான தாக்குதலை போர் என்று இந்தியா எந்த இடத்திலும் சொல்லவில்லை. துல்லியமான இந்த தாக்குதல்கள் போர் என்றால் எப்படி இருக்கும் என்பதை ஊகித்துக் கொள்ள பயங்கரவாதச் செயல்களில் ஈடுபடுவோருக்கும் அதை ஆதரிப்போருக்குமான எச்சரிக்கை மட்டுமே.

- கட்டுரையாளர்: ஊடகவியலாளர்.

நரேந்திர மோடி நாட்டு மக்களுக்கு அண்மையில் (மே 12) உரை யாற்றும்போது ஆபரேஷன் சிந்தூர் பாரதத்தின் தாய்மார்களுக்கும் சகோதரிகளுக்கும் மகள்களுக்கும் அர்ப்பணம் என்று தேசத்தின் பெண்களுக்கு சமர்ப்பித்தார். பாரதத்தில் பெண்கள் போற்றுதலுக்கு உரியவர்கள், அவர்களுக்கான நீதியைப் பெற்றுத்தருவதில் எந்த சமரசமும் இல்லை என்பதை மீண்டும் நிரூபித்திருக்கிறது தேசம். 'ஆபரேஷன் சிந்தூர்' என்பது நாட்டின் பல கோடி மக்களின் ஒருமித்த சிந்தனையின் பிரதிபலிப்பு. நியாயத்தை நிலைநாட்டுவதற்கான சபதம்.

குடும்பத்தினருடன் காஷ்மீரில் உள்ள பஹல்காமுக்கு சுற்றுலா சென்றவர்களைக் குறிவைத்து ஏப்ரல் 22-இல் பயங்கரவாதத் தாக்குதல் நடத்தப்பட்டது. குடும்பப் பெண்களின் கண்ணெதிரில் அவர்களது கணவர்கள் கொல்லப்பட்டனர். பாகிஸ்தான் ஆதரவு பெற்ற லஷ்கர்-ஏ-தொய்பா பயங்கரவாத அமைப்பின் துணை அமைப்பான 'தி ரெசிஸ்டன்ஸ் ஃப்ரன்ட்' பஹல்காமில் இந்தக் கொடூரத்தைச் செய்தது.

பயங்கரவாதிகள் மீது நடவடிக்கை எடுக்குமாறு பாகிஸ்தானை இந்தியா வலியுறுத்தியபோதும் ஏதும் பயனில்லை. பொறுமையாய் தனது ராஜீய நகர்வுகளைச் செய்து கொண்டிருந்த இந்தியா 'ஆபரேஷன் சிந்தூர்' என்ற தாக்குதல் நடவடிக்கையை திட்டமிட்டது.

கடந்த மே 7-ஆம் தேதி அதிகாலை இந்தத் தாக்குதல் வெற்றிகரமாக நிகழ்த்தப்பட்டது. இறந்தவர்களின் ஆன்மா பதினாறாம் நாள் மோட்சம் அடையும் என்பது இந்தியர்களின் நம்பிக்கை. அந்த நாளில் இந்தத் தாக்குதல் இறந்தவர்களுக்கான அஞ்சலியாகவும் கணவரை இழந்த பெண்களுக்கான ஆறுதலாகவும் அமைந்தது.

மே 7-ஆம் நாள் அதிகாலை பாகிஸ்தானுக்குள் ஊடுருவிய இந்தியப் போர் விமானங்கள் 25 நிமிஷங்களில் பஹவல்பூர், முஸாஃபர்பாத், முரித்கே, சியால்கோட், கோட்லி, பர்னாலா ஆகிய 6 இடங்களில் இருந்த 9 பயங்கரவாதிகளின் பயிற்சி மையங்களை 24 ஏவுகணைகளைப் பயன்படுத்தி அழித்தன.

'ஆபரேஷன் சிந்தூர்' தாக்குதலில் சுமார் 100 பயங்கரவாதிகள் கொல்லப்பட்டனர். பொதுமக்களுக்கு எந்த இடையூறும் இல்லை. பாகிஸ்தான் ராணுவத்துடனும் எந்த மோதலும் இல்லை.