வ.உ.சி. 154-ஆவது பிறந்த நாள்: சிலைக்கு மரியாதை

சுதந்திர போராட்ட வீரர் வ.உ.சிதம்பரனாரின் 154-ஆவது பிறந்த நாள் விழாவையொட்டி, தூத்துக்குடி மாவட்டத்தின் பல்வேறு இடங்களில் அவரது சிலைக்கு வெள்ளிக்கிழமை மாலை அணிவித்து மரியாதை செலுத்தப்பட்டது.

- 

தூத்துக்குடி கோவில்பட்டி, நாகர்கோவில்/திருச்செந்தூர்/உடன்குடி/ஆறுமுகனேரி, செப். 5:

ஓட்டப்பிடாரத்தில் அமைந்துள்ள வ.உ.சி. நினைவு இல்லத்தில் உள்ள அவரது உருவச் சிலைக்கு, தமிழக அரசு சார்பில், மாவட்ட ஆட்சியர் டி. இளம்பகவதன், ஓட்டப்பிடாரம் எம்.எல்.ஏ. எம்.சி.சண்முகையா அகியோர் மாலை அணிவித்து மரியாதை செலுத்தினர். தொடர்ந்து அவர், வ.உ.சிதம்பரனாரின் வாரிசுதாரர் உ.செல்விக்கு சால்வை அணிவித்து கௌரவித்ததுடன், வ.உ.சிதம்பரனாரின் வாழ்க்கை வரலாறு புகைப்படங்களை பார்வையிட்டார்.

விழாவில், செய்தி மக்கள் தொடர்பு அலுவலர் சே.ரா.நவீன் பாண்டியன், ஓட்டப்பிடாரம் வட்டாட்சியர் அறிவழகன், வட்டார வளர்ச்சி அலுவலர் ஐவகர் மற்றும் பலர் கலந்துகொண்டனர்.

கோவில்பட்டியில் சைவ வேளாளர் சங்க கட்டடத்தில் உள்ள வ.உ.சிதம்பரனார் சிலைக்கு சைவ வேளாளர் சங்க துணைச் செயலர் பிரபு தலைமையில் மாலை அணிவித்து மரியாதை செலுத்தினார். நிகழ்ச்சியில் தணிக்கையாளர் சுந்தரம், நிர்வாக குழு உறுப்பினர்கள் அதிநாராயணன், ஆறுமுக நாயகம் உள்ளிட்ட பலர் கலந்து கொண்டனர்.

அதிமுக சார்பில் முன்னாள் அமைச்சர்கள் வளர்மதி, கடம்பூர் செ.ராஜு எம்.எல்.ஏ. ஆகியோர் வ.உ.சி. சிலைக்கு மாலை அணிவித்து மலர் தூவி மரியாதை செலுத்தி அன்னதானத்தை தொடங்கி வைத்தனர். முன்னாள் எம்.எல்.ஏ. சின்னப்பன் உள்ளிட்ட பலர் கலந்து கொண்டனர்.

திமுக சார்பில் நகர்மன்றத் தலைவர் கருணாநிதி தலைமையில் வ.உ.சி. சிலைக்கு மாலை அணிவித்து மரியாதை செலுத்தப்பட்டது.

தேமுதிக நகரச் செயலர் நேதாஜி பாலமுருகன், மார்க்சிஸ்ட் கம்யூனிஸ்ட் கட்சி நகரச் செயலர் சீனிவாசன், கருத்துரிமை பாதுகாப்பு கூட்டமைப்புத் தலைவர் தமிழரசன், விசிக நகரச் செயலர் கருப்பசாமி பாண்டியன், திருக்குறள் கூட்டமைப்பு சார்பில் மாநில துணைத் தலைவர் கருத்தபாண்டி, தூத்துக்குடி மாவட்டச் செயலர் செல்லத்துரை என்ற செல்வம் உள்ளிட்ட பலர் வ.உ.சி. சிலைக்கு மாலை அணிவித்து மலர் தூவி மரியாதை செலுத்தினர்.