எல்லை மாநிலங்களில் அமைதி

ஓய்ந்தது தாக்குதல்

- 

ஸ்ரீநகர், சண்டீகர், மே 11: இந்தியா-பாகிஸ்தான் இடையே சண்டை நிறுத்தம் மேற்கொள்ளப்பட்டதைத் தொடர்ந்து, ஜம்மு-காஷ்மீர், பஞ்சாப், ராஜஸ்தான் ஆகிய எல்லை மாநிலங்களில் மீண்டும் அமைதி திரும்பி வருகிறது.

சண்டை நிறுத்த அறிவிப்பு வெளியான பிறகும் சனிக்கிழமை பாகிஸ்தான் தாக்குதல் நடத்தியது. ஆனால், ஞாயிற்றுக்கிழமை எல்லையில் மோதல் எதுவும் நடைபெறாமல் அமைதி நிலவியது.

பஹல்காம் பயங்கரவாதத் தாக்குதலுக்கு பதிலடி கொடுக்கும் வகையில், பாகிஸ்தானில் பயங்கரவாத முகாம்களைக் குறிவைத்து 'ஆபரேஷன் சிந்தூர்' நடவடிக்கையை இந்தியா மேற்கொண்டது. இதையடுத்து, ஜம்மு-காஷ்மீர் முதல் குஜராத் வரை எல்லையோர இந்திய மாநிலங்கள் மீது பாகிஸ்தான் வான்வழி தாக்குதலில் ஈடுபட்டது.

பாகிஸ்தானின் ட்ரோன், ஏவு கணைகளை இந்திய வான் பாதுகாப்பு அமைப்பு வெற்றிகரமாக முறியடித்தது. எனினும், எல்லையையொட்டிய மாவட்டங்களில் இரவு நேரங்களில் மின்சாரத்தை துண்டித்து முன்னெச்சரிக்கை நடவடிக்கை எடுக்கப்பட்டது.