பஹல்காம் தாக்குதலைக் கண்டித்து ஜம்மு-காஷ்மீர் பேரவையில் தீர்மானம்

முதல்வராகத் தோற்றுவிட்டதாக ஒமர் அப்துல்லா வருத்தம்

- 

ஜம்மு, ஏப். 28: பஹல்காம் பயங்கரவாதத் தாக்குதலைக் கண்டித்து, ஜம்மு-காஷ்மீர் பேரவையில் திங்கள்கிழமை ஒருமனதாக தீர்மானம் நிறைவேற்றப்பட்டது. அப்போது சுற்றுலா பயணிகளின் பாதுகாப்பை உறுதிசெய்யத் தவறியதன் மூலம், ஒரு முதல்வராகத் தோற்றுவிட்டதாக ஜம்மு-காஷ்மீர் முதல்வர் ஒமர் அப்துல்லா வருத்தம் தெரிவித்தார்.

ஒமர் அப்துல்லா மாநில சுற்றுலாத் துறையையும் தன்வசம் வைத்தார்.

பஹல்காமில் கடந்த வாரம் பயங்கரவாதிகள் நடத்திய தாக்குதலில் 26 சுற்றுலாப் பயணிகள் உயிரிழந்தனர். இந்தத் தாக்குதலின் பின்னணியில் பாகிஸ்தான் இருப்பதாக மத்திய அரசு கூறி வருவதோடு அந்நாட்டுடனான உறவை துண்டிக்கும் வகையிலான பல்வேறு நடவடிக்கைகளும் மேற்கொண்டு வருகிறது.

இந்த நிலையில், பஹல்காம் தாக்குதலைக் கண்டித்து ஜம்மு-காஷ்மீர் பேரவையின் சிறப்பு அமர்வில் திங்கள்கிழமை ஒருமனதாகத் தீர்மானம் நிறைவேற்றப்பட்டது.

இந்தத் தீர்மானம் குரல் வாக்கெடுப்பு மூலம் நிறைவேற்றப்பட்டது. முன்னதாக, அவை கூடியவுடன் பஹல்காம் பயங்கரவாதத் தாக்குதலில் உயிரிழந்தவர்களுக்கு அவை யிலிருந்த அனைவரும் எழுந்து நின்று 2 நிமிடங்கள் மௌன அஞ்சலி செலுத்தினர்.

அதன்பிறகு பஹல்காம் தாக்குதலுக்குக் கண்டனம் தெரிவிக்கும் தீர்மானத்தை ஜம்மு-காஷ்மீர் துணை முதல்வர் சுரிந்தர் சௌதரி அறிமுகப்படுத்தினார்.