ஒரே பதவி உயர்வுடன் ஓய்வுபெறும் காவல் ஆய்வாளர்கள்!

தமிழக காவல் துறையில் 28 ஆண்டுகளாக ஒரே ஒரு பதவி உயர்வு மட்டுமே பெற்று, விரக்தியுடன் காவல் ஆய்வாளர்கள் ஓய்வு பெற்று வருகின்றனர்.

- கே.வாசுதேவன்

நாட்டின் ஐந்தாவது பெரிய காவல் துறையான, தமிழக காவல் துறையின் கீழ் 1,321 சட்டம் மற்றும் ஒழுங்கு காவல் நிலையம், 244 அனைத்து மகளிர் காவல் நிலையங்கள், 290 போக்குவரத்து அமலாக்கம் மற்றும் போக்குவரத்து புலனாய்வுப் பிரிவு காவல் நிலையங்கள், 47 ரயில்வே காவல் நிலையங்கள் உள்ளன.

தமிழக காவல் துறையில் டிஜிபி தொடங்கி காவலர் வரை 1,33,961 பேர் பணிபுரிகின்றனர். இதில் கூடுதல் காவல் கண்காணிப்பாளர்களாக 208 பேரும், காவல் துணைக் கண்காணிப்பாளர்களாக 980 பேரும், காவல் ஆய்வாளர்களாக 3,396 பேரும் உள்ளனர்.

தற்போதைய மக்கள்தொகையின்படி 632 பேருக்கு ஒரு காவலர் என்ற அடிப்படையில் காவலர்கள் இருப்பதாக புள்ளிவிவரங்கள் தெரிவிக்கின்றன. தமிழக காவல் துறையில் சட்டம்-ஒழுங்கு பிரிவு உள்பட 18 பிரிவுகள் உள்ளன.