அரசுப் பல்கலை. துணைவேந்தர்கள் புறக்கணிப்பு

உதகையில் ஆளுநர் ஆர்.என்.ரவி கூட்டிய துணைவேந்தர்கள் மாநாட்டை தமிழக அரசுப் பல்கலைக்கழகங்களின் துணைவேந்தர்கள் புறக்கணித்தனர்.

- 

மாநாட்டில் பங்கேற்கக் கூடாது என காவல் துறை மூலம் துணைவேந்தர்கள் மிரட்டப்பட்டதாக முதல்வர் மு.க.ஸ்டாலின் மீது ஆளுநர் குற்றஞ்சாட்டினார்.

பல்கலைக்கழக துணைவேந்தர்களை தமிழக அரசே நியமிக்கும் அதிகாரம் உள்ளிட்ட 10 மசோதாக்களுக்கு ஆளுநர் ஆர்.என்.ரவி ஒப்புதல் அளிக்காமல் நிறுத்தி வைத்திருந்தார். இதுதொடர்பாக தமிழக அரசு தொடுத்த வழக்கில், ஆளுநருக்கு கண்டனம் தெரிவித்த உச்சநீதிமன்றம், தமது சிறப்பு அதிகாரத்தைப் பயன்படுத்தி, அந்த 10 மசோதாக்களுக்கும் ஒப்புதல் வழங்கியது.

இதையடுத்து, பல்கலைக்கழக துணைவேந்தர்களை சென்னை தலைமைச் செயலகத்துக்கு அழைத்து முதல்வர் மு.க.ஸ்டாலின் அண்மையில் ஆலோசனை நடத்தினார். இதற்கிடையே,தமிழக பல்கலைக்கழக துணைவேந்தர்கள் பங்கேற்கும் இரண்டு நாள் மாநாடு உதகையில் நடைபெறும் என ஆளுநர் அறிவித்தார்.

துணைவேந்தர்கள் விவகாரத்தில் ஆளுநருக்கும், தமிழக அரசுக்கும் அதிகாரப் போட்டி நிலவுவதாக தகவல்கள் வெளியான நிலையில், அந்த தகவல்களை ஆளுநர் மாளிகை மறுத்தது. மத்திய, மாநில மற்றும் தனியார் பல்கலைக்கழகங்கள் உள்ளிட்ட உயர் கல்வி நிறுவனங்களின் தலைவர்களின் வருடாந்திர மாநாடு 2022-ஆம் ஆண்டுமுதல் ஆண்டுதோறும் நடத்தப்பட்டு வருகிறது. அந்த வகையில், நிகழாண்டும் இந்த மாநாட்டை நடத்துவதற்கான திட்டமிடல் பணிகள் கடந்த ஜனவரி மாதமே தொடங்கப்பட்டு விட்டன.

கல்வி வளர்ச்சிக்காக நடத்தப்படும் இந்த மாநாட்டை சில ஊடகங்கள் தவறாகச் சித்தரிப்பதுடன் சமீபத்திய நீதிமன்றத் தீர்ப்புடன் இணைத்து, இதை ஆளுநருக்கும் தமிழக அரசுக்கும் இடையிலான மோதலாக கட்டமைக்க முயற்சி மேற்கொள்வது வருந்தத்தக்கது என ஆளுநர் மாளிகை விளக்கம் அளித்தது.

மாநாடு தொடக்கம்: இந்நிலையில், நீலகிரி மாவட்டம், உதகையில் உள்ள ராஜ்பவன் மாளிகையில் தமிழக பல்கலைக்கழகத் துணைவேந்தர்கள் பங்கேற்கும் இரண்டு நாள் மாநாடு வெள்ளிக்கிழமை (ஏப். 25) தொடங்கியது.

சிறப்பு விருந்தினராக குடியரசு துணைத் தலைவர் ஜகதீப் தன்கர் பங்கேற்றுப் பேசினார்.