வளரும் துறைகளில் ஒத்துழைப்பை மேம்படுத்த இந்தியா-சிங்கப்பூர் உறுதி

வளா்ந்து வரும் துறைகளான எண்மமயமாக்கம், திறன் மேம்பாடு, நிலையான வளர்ச்சி, சுகாதார வசதிகள் மற்றும் மருந்துகள், அதிநவீன உற்பத்திமுறை, இணைப்பு வசதிகள் ஆகியவற்றின் ஒத்துழைப்பை மேலும் மேம்படுத்த இந்தியாவும் சிங்கப்பூரும் உறுதிபூண்டுள்ளன.

- 

இந்தியா-சிங்கப்பூர் இடையே அமைச்சர்கள் அளவிலான 2-ஆவது வட்டமேஜை (ஐஎஸ்எம்ஆர்) கூட்டம், சிங்கப்பூரில் திங்கள்கிழமை நடைபெற்றது.

இதில், இந்திய தரப்பில் மத்திய நிதியமைச்சர் நிர்மலா சீதாராமன் தலைமையில் வெளியுறவுத் துறை அமைச்சர் எஸ்.ஜெய்சங்கர், வாணிகம்-தொழில்துறை அமைச்சர் பியூஷ் கோயல், ரயில்வே துறை அமைச்சர் அஸ்வினி வைஷ்ணவ் ஆகியோர் கொண்ட குழு பங்கேற்றது. சிங்கப்பூர் தரப்பில் அந்நாட்டின் துணை பிரதமரும் வாணிகம்-தொழில் துறை அமைச்சருமான கன் கிம் யாங் தலைமையில் வெளியுறவுத் துறை அமைச்சர் விவியன் பாலகிருஷ்ணன், உள்துறை மற்றும் சட்டத் துறை அமைச்சர் கே.சண்முகம், எண்ம மேம்பாடு, தகவல் மற்றும் உள்துறை இணையமைச்சர் ஜோஸ்பின் டியோ உள்ளிட்டோர் கொண்ட குழு கலந்துகொண்டது.

இக்கூட்டத்தில், எதிர்கால முக்கியத்துவம் கொண்ட வளரும் துறைகளில் இரு நாடுகள் இடையே ஒத்துழைப்பை மேலும் மேம்படுத்த கூட்டத்தில் உறுதியேற்கப்பட்டதாக மத்திய நிதியமைச்சகம் வெளியிட்ட எக்ஸ் பதிவில் தெரிவிக்கப்பட்டுள்ளது.

அதில் மேலும் கூறப்பட்டுள்ளதாவது: ஐஎஸ்எம்ஆர் அமைப்புமுறையின் கீழ் அடையாளம் காணப்பட்ட 6 முக்கிய ‘தூண்களான’ எண்மமயமாக்கம், திறன் மேம்பாடு, நிலையான வளர்ச்சி, சுகாதார வசதிகள் மற்றும் மருந்துகள், அதிநவீன உற்பத்திமுறை, இணைப்பு வசதிகள் ஆகியவற்றில் இருதரப்பு ஒத்துழைப்பை மேம்படுத்துவதற்கான வழிமுறைகள் குறித்து விரிவாக ஆலோசிக்கப்பட்டது.