பண்பாட்டுத் திருவிழாக்களை அனைவரும் இணைந்து கொண்டாட வேண்டும்

‘மா மதுரை’ விழாவைத் தொடங்கி வைத்து முதல்வர் ஸ்டாலின் பேச்சு

- 

ஜாதி, மத வேறுபாடுகளுக்கு இடமளிக்காமல் பண்பாட்டுத் திருவிழாக்களை அனைவரும் இணைந்து கொண்டாட வேண்டும் என்று முதல்வர் மு.க.ஸ்டாலின் கேட்டுக் கொண்டார்.

மதுரை தமுக்கம் மைதானத்தில் வியாழக்கிழமை நடைபெற்ற 'மாமதுரை' விழாவை முதல்வர் மு.க.ஸ்டாலின் சென்னையிலிருந்து காணொலி வழியாக தொடங்கி வைத்துப் பேசியதாவது: மதுரை மாநகர் என்பது பல்வேறு வரலாற்று பெருமைகளைக் கொண்டது. இந்தியாவின் தொன்மையான நகரங்களில் ஒன்று.

இரண்டாயிரம் ஆண்டு வரலாறு கொண்டது. பாண்டிய மன்னர்கள் தலைநகராக ஆட்சி செய்த நகரமாகவும், ஆரியப்படை கடந்த நெடுஞ்செழியப் பாண்டியன் ஆட்சி செய்த நகரமாகவும் திகழ்ந்தது.

"தவறு செய்தவன் மன்னனே ஆனாலும் விடமாட்டேன்" என்று மன்னனை நோக்கி கண்ணகி கேள்வி கேட்ட மண்ணும் இதுதான். நீதியைக் காக்க தன்னுடைய உயிரையே தந்த மன்னரும், திருமலைநாயக்கரும், ராணி மங்கம்மாளும் ஆண்ட புகழ்மிக்க பூமி மதுரை.

அனைத்துக் கலைகளும் ஒருங்கே இருக்கும் பண்பாட்டு சின்னமாக உலகப் புகழ் பெற்ற மீனாட்சி சுந்தரேசுவரர் கோயில் அமைந்துள்ளது.

புகழ் பெற்ற மதுரை சித்திரைத் திருவிழா மாபெரும் பண்பாட்டு விழாவாக ஆண்டுதோறும் நடைபெற்று வருகிறது.