2,668 அடி உயர மலை மீது மகா தீபம்

திருவண்ணாமலையில் லட்சக்கணக்கான பக்தர்கள் தரிசனம்

- 

திருவண்ணாமலை ஸ்ரீஅருணாசலேஸ்வரா் கோயில் காா்த்திகை மகா தீபத் திருவிழாவையொட்டி, 2,668 அடி உயர மலை மீது ஞாயிற்றுக்கிழமை மாலை 6 மணிக்கு மகா தீபம் ஏற்றப்பட்டது.

முன்னதாக, கோயில் மூலவா் சந்நிதியில் அதிகாலை 3.30 மணிக்கு பரணி தீபம் ஏற்றப்பட்டது. இவற்றை லட்சக்கணக்கான பக்தா்கள் தரிசனம் செய்தனா்.

அருணாசலேஸ்வரா் கோயிலில் நிகழாண்டுக்கான மகா தீபத் திருவிழா கடந்த 17-ஆம் தேதி கொடியேற்றத்துடன் தொடங்கி நடைபெற்று வருகிறது.

பஞ்ச ரதங்களின் தேரோட்டம்: கடந்த 22-ஆம் தேதி இரவு வெள்ளித் தேரோட்டமும், 23-ஆம் தேதி அதிகாலை முதல் 24-ஆம் தேதி அதிகாலை 3 மணி வரை விநாயகா், முருகன், உண்ணாமுலையம்மன் சமேத அருணாசலேஸ்வரா், பராசக்தி அம்மன், சண்டிகேஸ்வரா் உள்ளிட்ட பஞ்ச ரதங்களின் தேரோட்டமும் நடைபெற்றது.

பரணி தீபம்: தீபத் திருவிழாவின் 10-ஆவது நாளான ஞாயிற்றுக்கிழமை பரணி தீபம், மகா தீபம் ஏற்றும் நிகழ்வுகள் நடைபெற்றன. இதையொட்டி, அதிகாலை 2 மணிக்கு கோயில் நடை திறக்கப்பட்டு மூலவா் அருணாசலேஸ்வரா், உண்ணாமுலையம்மனுக்கு சிறப்பு அபிஷேக-ஆராதனைகள் நடைபெற்றன.