ஈரான் VS பாகிஸ்தான்...

இஸ்லாமிய நாடுகளுக்குள் எப்போதுமே சண்டை வராது. சண்டை வரவே வராது...'

- 

இப்படியொரு நம்பிக்கை இருந்தது. இப்பொழுதல்ல.ஒரு காலத்தில்.

ஆனால், 1980ம் ஆண்டு தொடங்கிய ஈரான் – ஈராக் போர் இந்த நம்பிக்கைக்கு முற்றுப்புள்ளி வைத்துவிட்டது.

அதன் பிறகு சின்னச் சின்னதாக ஒரே மதத்தைச் சேர்ந்த இரு நாடுகளுக்கு இடையே முட்டல் மோதல் யுத்தம் எல்லாம் இந்த 40 ஆண்டுகளில் உலகளவில் நடந்துவிட்டது; நடந்தும் வருகிறது. இது நிற்காது. இனியும் நடக்கும் என சர்வதேச பார்வையாளர்கள் வருத்தத்துடன் கருத்து தெரிவிக்கிறார்கள்.

அதற்கேற்பதான் இந்தாண்டு தொடக்கத்தில் ஒரு விஷயம் அரங்கேறத் தொடங்கியுள்ளது.

ஆம். இப்போது ஈரான் பாகிஸ்தான் இடையே சின்னதாக ஒரு முட்டல் மோதல் தொடங்கியிருக்கிறது. இரு நாடுகளும் மாறி மாறி ஏவுகணைகள், டுரோன்கள் மூலம் ஒன்றையொன்று தாக்கி உலகநாடுகளை பதற்றத்தில் ஆழ்த்த ஆரம்பித்துள்ளன.

மத்திய கிழக்குப்பகுதி ஏற்கெனவே மல்யுத்தகளமாக இருக்கிறது. இஸ்ரேல் ராணுவத்துக்கும், ஹமாஸ் இயக்கத்துக்கும் இடையே காசா பகுதியில் நடந்து வரும் சண்டை 100 நாள்களைக் கடந்து போய்க் கொண்டிருக்கிறது.

இன்னொருபுறம் செங்கடல் வழியாகச் செல்லும் அமெரிக்க, இஸ்ரேல் ஆதரவுக் கப்பல்கள் மீது ஏமன் நாட்டின் ஊத்தி தீவிரவாதிகள் ஏவுகணை, டுரோன் தாக்குதல்களை நடத்த... இதற்கு பதிலடியாக ஊத்தி அமைப்பினரின் தளங்கள் மீது அமெரிக்கா, பிரிட்டன் நாடுகளின் கூட்டு விமானப்படைகள் இதுவரை ஆறுமுறை வான் தாக்குதல்களை நடத்தி விட்டன.

இந்தப் பரபரப்புகளுக்கு நடுவில்தான் பாகிஸ்தான் மீது ஏவுகணை, ஆளில்லாடுரோன்களை ஏவி ஈரான் தாக்குதல் தொடுத்திருக்கிறது.

பதிலுக்கு பாகிஸ்தானும், ஈரான் மீது எதிர்த்தாக்குதல் நடத்தியிருக்கிறது.

சரி. பாகிஸ்தானுக்கும், ஈரானுக்கும் இடையில் அப்படி என்னதான் பிரச்னை? ஈரான் நாடு, ஒரு மத்திய கிழக்கு நாடுதான். ஆனால், அது அரபு நாடல்ல ஷியா பிரிவு முஸ்லீம்கள் அதிகம் வாழும் நாடு ஈரான்.