വീട്ടിലിരുന്നു പഠിക്കാൻ MOOC പിടിക്കാം

ചരിത്രം മുതൽ എഐ വരെ ഓൺലൈനിൽ പഠിക്കാവുന്ന സൗകര്യങ്ങൾ അടത്തറിയാം. സൗജന്യ കോഴ്സുകളും ഏറെയുണ്ട് ഇക്കൂട്ടത്തിൽ.

- ബി.എസ്.വാരിയർ

MOOC (മാസിവ് ഓപ്പൺ ഓൺലൈൻ കോഴ്സുകൾ) ഉപയോഗിച്ച് ലോകത്തെ മുൻനിര സർവകലാശാലകളും സ്ഥാപനങ്ങളും കോടിക്കണക്കിനു പേർക്ക് ഓൺലൈൻ വിദ്യാഭ്യാസം നൽകുന്നു. ഭാഷയും ചരിത്രവും സയൻസും അടക്കം പരമ്പരാഗത വിഷയങ്ങൾ മുതൽ നിർമിതബുദ്ധിയുടെ അനുഗ്രഹങ്ങൾ വരെ ഇത്തരം കോഴ്സുകളിലുണ്ട്. മിക്കതും സൗജന്യമാണ്. സർട്ടിഫിക്കേഷനു ഫീ നൽകേണ്ടി വരും.

കരിയർ മെച്ചപ്പെടുത്തുക, പുതിയ കരിയറിലേക്കു മാറുക, കോളജ് പഠനം കൂടുതൽ ഫലപ്രദമാക്കുക, സ്വന്തം സ്ഥാപനത്തിന്റെ കാര്യക്ഷമത മെച്ചപ്പെടുത്തുക, സംതൃപ്തിക്കു വേണ്ടി ജീവിതകാലം മുഴുവൻ പുതിയ കാര്യങ്ങൾ പഠിക്കുക തുടങ്ങി വിവിധലക്ഷ്യങ്ങളോടെ ലോകമെങ്ങുമുള്ള ദശലക്ഷക്കണക്കിനു പേർ MOOC പ്രയോജനപ്പെടുത്തിവരുന്നു.

പ്രയോജനങ്ങൾ

എവിടെയിരുന്നും ഏതു നേരത്തും പഠിക്കാം എന്നതാണ് ഇത്തരം കോഴ്സുകളുടെ ഏറ്റവും വലിയ സൗകര്യം.

നമ്മുടെ ഉപരിപഠന പ്രോഗ്രാമുകളിൽ സയൻസ് പഠിക്കുന്നവർക്കു മാനവികവഷയങ്ങളോ മറിച്ചോ പഠിക്കാൻ സാധാരണ സൗകര്യമില്ല. ഇതിനു പരിഹാരമായി MOOC പ്രയോജനപ്പെടുത്താം. ഉദാ: കെമിസ്ട്രി പഠിക്കുന്നവർക്ക് ഇക്കണോമിക്സിൽ താൽപര്യമുണ്ടെങ്കിൽ ഈ വഴി സ്വീകരിക്കാം പഠനസൗകര്യമില്ലാത്ത സാഹചര്യത്തിൽ മുതിർന്നവർക്കും ഇഷ്ടവിഷയങ്ങൾ പഠിക്കാം. കർണാടകസംഗീതത്തിൽ പ്രാവീണ്യമുള്ളയാൾക്കു പാശ്ചാത്യസംഗീതം ശീലിക്കാമെന്നത് ഉദാഹരണം.

കോളജിൽ പഠിക്കുന്ന വിഷയത്തിൽ സിലബസിലില്ലാത്ത മേഖലകളിലും പ്രാവീണ്യം കൈവരിക്കാം.

എൻജിനീയറിങ് കോളജിലും മറ്റും ക്യാംപസ് സിലക്ഷൻ വേളയിൽ കൂടുതൽ വെയ്റ്റേജ് കിട്ടാൻ പഠനവിഷയവുമായി ബന്ധപ്പെട്ട ഓൺലൈൻ കോഴ്സുകളിലെ യോഗ്യത ഉപകരിക്കും.

പഠനസൗകര്യങ്ങൾ

അധ്യാപകർ ക്ലാസെടുക്കുന്നതു വെറുതേ വിഡിയോയിലാക്കി സംപ്രേഷണം ചെയ്യുകയല്ല, മറിച്ച് ഐടിയുടെ സമസ്തസാധ്യതകളും പ്രയോജനപ്പെടുത്തി, അധ്യാപനം കൂടുതൽ ഫലപ്രദമാക്കുകയാണു ചെയ്യുന്നത്.