ബ്രേക്ക് ഫാസ്റ്റിന് NO വേണ്ട

തലച്ചോറിന്റെ ഊർജ്ജസ്രോതസ്സായ ഗ്ലൂക്കോസ് പ്രാതലിലൂടെ കുട്ടികൾക്ക് ലഭ്യമാക്കണം.

- സുമ മാക്സിമിൻ

സ്ലിം ബ്യൂട്ടിയാവാൻ ബ്രേക്ക് ഫാസ്റ്റ് ഉപേക്ഷിക്കുക എന്നത് ഇന്നത്തെ പെൺകുട്ടികളുടെ സ്വഭാവമാണ്. തടി കുറയ്ക്കാൻ ഇത് സഹായകരമാകുമെന്നാണ് ചിലരുടെ ചിന്ത. സത്യത്തിൽ "ഇല്ലാത്ത രോഗത്തിന് വല്ലാത്തൊരു ചികിത്സ' എന്ന അവസ്ഥയിലേ ഇത് കൊണ്ടെത്തിക്കൂ. ദിവസത്തിലെ ആദ്യഭക്ഷണമെന്ന നിലയിൽ പ്രാതലിന് പ്രത്യേക പ്രാധാന്യമുണ്ട്. പോഷകമൂല്യവും സ്വാദും നിറഞ്ഞതായിരിക്കണം പ്രഥമ ഭക്ഷണം. പ്രാതലിലൂടെ ദിവസത്തിന് ശക്തമായൊരു തുടക്കമാണ് ലഭിക്കുന്നത്. ജോലി സ്ഥലത്ത് അല്ലെങ്കിൽ കോളേജിൽ എത്തിച്ചേരാനുള്ള വ്യഗ്രതയിൽ പ്രാതൽ ഉപേക്ഷിക്കുകയോ പേരിനെന്തെങ്കിലും വാരിവലിച്ച് കഴിക്കുകയോ ചെയ്യുന്നവർ ധാരാളമുണ്ട്. അങ്ങനെ ആഹാരരീതിയിലെ പാകപ്പിഴകൾ ഇവിടെ തുടങ്ങുന്നു.