சிவகங்கை, ராமநாதபுரம் மாவட்டங்களில் மே தின விழா

சிவகங்கை மாவட்டத்தில் மே தினத்தை முன்னிட்டு, தொழிற்சங்கங்கள் சார்பில் சங்கக் கொடியேற்றி இனிப்புகள் வழங்கப்பட்டன.

- 

சிவகங்கை/மானாமதுரை/காரைக்குடி/ராமேசுவரம், மே 1: சிவகங்கை மாவட்டத்தில் மே தினத்தை முன்னிட்டு, தொழிற்சங்கங்கள் சார்பில் சங்கக் கொடியேற்றி இனிப்புகள் வழங்கப்பட்டன.

சிவகங்கை சிவன் கோயில் பகுதியில் உள்ள தனியார் மஹாலில் சிவகங்கை சீமை அமைப்பு சாராக் கட்டுமானத் தொழிலாளர் நல வாரிய சங்கம், சிவகங்கை சிவில் இன்ஜினியரிங் அசோசியேசன், மதுரை சரவணா மருத்துவமனை ஆகியவை இணைந்து பொது, இருதய பரிசோதனை முகாமை நடத்தின. இதில் சிவகங்கை நகரைச் சேர்ந்தவர்கள் பரிசோதனைகள் செய்து கொண்டனர். முன்னதாக, சிவகங்கை நகர்மன்றத் தலைவர் சி.எம். துரை ஆனந்த் ரத்ததான முகாமைத் தொடங்கி வைத்து, கட்டடத் தொழிலாளர்களுக்கு இலவச வேட்டி, சேலைகளை வழங்கினார்.

சிவகங்கை தொகுதி சட்டப்பேரவை உறுப்பினர் பி.ஆர்.செந்தில்நாதன், மருத்துவமனை மேலாளர் கார்த்திகைகுமார், பொறியாளர்கள் பாரதிதாசன், எஸ்.எம். சுந்தரமாணிக்கம், சிவகங்கை தொழிலாளர் நல வாரிய சங்க நிர்வாகிகள், சட்ட ஆலோசகர்கள் உள்ளிட்டோர் கலந்து கொண்டனர்.

தேவகோட்டையில்..

சிவகங்கை மாவட்டம், தேவகோட்டை தியாகிகள் பூங்காவில் வ.உ.சிதம்பரம் பிள்ளை பேரவை சார்பில் மே தின விழா கொண்டாடப்பட்டது. இதற்கு சங்கத் தலைவர் சுப்பிரமணியன் தலைமை வகித்தார். புரவலர் முருகேசன், பொருளாளர் ஜானகிராமன் செல்வராஜ் ஸ்தபதி ஆகியோர் முன்னிலை வகித்தனர்.