இந்தியா மூன்றாவது முறை சாம்பியன்

ரோஹித், வருண், குல்தீப் அசத்தல்

- 

துபை, மார்ச் 9: கேப்டன் ரோஹித், ஸ்பின்னர்கள் குல்தீப், வருண் சக்கரவர்த்தியின் அற்புத ஆட்டத்தால், ஐசிசி சாம்பியன்ஸ் கோப்பை கிரிக்கெட் போட்டி இறுதி ஆட்டத்தில் நியூஸிலாந்து அணியை 4 விக்கெட் வீழ்த்தி மூன்றாவது முறையாக பட்டம் வென்றது இந்தியா.

முதலில் ஆடிய நியூஸி. அணி 251/7 ரன்களை சேர்த்தது. பின்னர் ஆடிய இந்திய அணி 254 ரன்களை சேர்த்து வென்றது.

பாகிஸ்தான் கிரிக்கெட் வாரியம் சார்பில் ஐசிசி சாம்பியன்ஸ் கோப்பை போட்டி நடைபெற்று வந்தது. இதில் தலைசிறந்த 8 அணிகள் பங்கேற்று ஆடின. பாகிஸ்தானில் நிலவும் அரசியல் சூழலால் இந்திய அணி அங்கு பங்கேற்க செல்லவில்லை. இந்திய அணியின் அனைத்து ஆட்டங்களும் ஹைபிரிட் முறையில் துபையில் நடைபெற்றன.

லீக் சுற்றில் தோல்வியே காணாத இந்திய அணி அரையிறுதியில் ஆஸ்திரேலியாவை வீழ்த்தி இந்தியாவும், தென்னாப்பிரிக்காவை வீழ்த்தி நியூஸிலாந்தும் இறுதி கட்டத்துக்கு தகுதி பெற்றன.

இந்த நிலையில் இந்திய -நியூஸிலாந்து அணிகள் இடையிலான இறுதி ஆட்டம் துபை சர்வதேச கிரிக்கெட் மைதானத்தில் ஞாயிற்றுக்கிழமை நடைபெற்றது. இந்திய அணியில் எந்த மாற்றம் செய்யப்படவில்லை. 4 ஸ்பின்னர்களுடன் களமிறங்கியது. நியூஸிலாந்து அணியில் பௌலர் மேட் ஹென்றி காயத்தால் விலகியது பாதகமாக அமைந்தது. டாஸ் வென்ற நியூஸிலாந்து அணி பேட்டிங்கை தேர்வு செய்தது.