நவ. 5-இல் தவெக சிறப்புப் பொதுக் குழு

தவெக சிறப்புப் பொதுக் குழுக் கூட்டம் நவ. 5-ஆம் தேதி நடைபெறும் என கட்சித் தலைவர் விஜய் அறிவித்துள்ளார்.

- 

இது குறித்து அவர் புதன்கிழமை வெளியிட்டுள்ள அறிக்கை: சூழ்ச்சியாளர்கள் தவெகவுக்கு எதிராகச் செய்யும் சூழ்ச்சிகளை அச்சமின்றி உடைத்தெறிந்துவிட்டு, அன்னைத் தமிழக மக்களுக்காக ஆர்த்தெழ வேண்டிய தருணம் இது. தவெகவின் படைக்கலன்களாக தொண்டர்களும், காக்கும் கவசமாக தமிழக மக்களும் உள்ளனர். இச்சூழலில், மக்களின் குரலாகத் தொடரும் நமது வெற்றிப் பயணத்தை யாராலும் தடுக்க இயலாது.

கடந்த ஒரு மாத காலமாக தமிழக மக்களே இதை மௌன சாட்சியாக உலகுக்கு உரைத்துக் கொண்டிருந்தனர். சூழ்ச்சிகளாலும், சூதுகளாலும் நம்மை வென்றுவிடலாம் என்று கனவு காணும் எதிரிகளும் இதை உணர்ந்துள்ளனர். கள நிலவரம் நம்மை ஊக்குவிப்பதாக இருக்கும் நிலையில், நமது அடுத்த அடியை இன்னும் நிதானமாக, தீர்க்கமாக எடுத்து வைக்க வேண்டும்.