ஜிஎஸ்டி சீர்திருத்தம்: மாநிலங்கள் ஒத்துழைக்க வேண்டும்

பிரதமர் மோடி வேண்டுகோள்

- 

புது தில்லி, ஆக. 17: அடுத்த தலைமுறைக்கான சரக்கு மற்றும் சேவை வரி (ஜிஎஸ்டி 2.0) சீர்திருத்தம் தொடர்பான வரைவு அறிக்கையை மாநிலங்களின் பார்வைக்கு மத்திய அரசு அனுப்பி வைத்துள்ளது. இதனை தீபாவளி பண்டிகைக்கு முன்பு அமல்படுத்த மாநில அரசுகளின் ஒத்துழைப்பு தேவை என்று பிரதமர் நரேந்திர மோடி கேட்டுக் கொண்டார்.

தில்லியில் ஞாயிற்றுக்கிழமை இரு அதிவிரைவு நெடுஞ்சாலைகளைத் திறந்து வைத்த பிரதமர் மோடி இது தொடர்பாக மேலும் பேசியதாவது: ஜிஎஸ்டி சட்டத்தை மத்திய அரசு எளிமைப்படுத்த இருக்கிறது. வரி விகிதங்கள் மாற்றியமைக்கப்பட்டுள்ளன. நல்ல நிர்வாகத்துக்கு சீர்திருத்தம் மிகவும் முக்கியமானது.

இரட்டிப்பு ஆதாயம்: புதிய சீர்திருத்தங்கள் மூலம் வர்த்தக செயல்பாடுகளும், மக்களின் வாழ்க்கையும் மேலும் எளிதாகவும், வசதியாகவும் மாறும். இந்த தீபாவளியில் ஜிஎஸ்டி சீர்திருத்தம் மூலம் மக்களுக்கு இரட்டிப்பு ஆதாயம் கிடைக்கும். கொண்டாட்டம் மேலும் உற்சாகமடையும். ஜிஎஸ்டி சீர்திருத்த வரைவு அறிக்கை மாநிலங்களின் பார்வைக்கு அனுப்பப்பட்டுள்ளது. இதனை தீபாவளி பண்டிகைக்கு முன்பு அமல்படுத்த மாநில அரசுகள் மத்திய அரசுடன் ஒத்துழைக்கும் என்று நம்புகிறேன்.