ரூ.78.36 லட்சத்துக்கு உறுதியான புத்தக விற்பனை!

திண்டுக்கல்லில் நடைபெறும் 12-ஆவது புத்தகத் திருவிழாவில் ரூ.78.36 லட்சத்துக்கு புத்தக விற்பனை உறுதிப்படுத்தப்பட்டிருப்பதால், பதிப்பக உரிமையாளர்கள், விற்பனையாளர்கள் மகிழ்ச்சியடைந்தனர்.

- நமது நிருபர்

நமது நிருபர் திண்டுக்கல், செப். 4:

திண்டுக்கல் மாவட்ட நிர்வாகம், பொது நூலக இயக்ககம், திண்டுக்கல் இலக்கியக் களம் சார்பில் 12-ஆவது புத்தகத் திருவிழா கடந்த மாதம் 28-ஆம் தேதி தொடங்கியது.

திண்டுக்கல் அங்கு விலாஸ் மேல்நிலைப் பள்ளி வளாகத்தில் 126 அரங்குகளுடன் தொடங்கிய இந்த புத்தகத் திருவிழா வருகிற 7-ஆம் தேதி வரை நடைபெறுகிறது. 80 பதிப்பகங்கள் மூலம் பல லட்சம் புத்தகங்கள் காட்சிப்படுத்தப்பட்டுள்ளன. வியாழக்கிழமை வரையிலான முதல் 8 நாள்களில் மட்டும் 60 ஆயிரத்துக்கும் மேற்பட்டோர், புத்தகக் கண்காட்சியை பார்வையிட்டனர்.

இந்த புத்தகத் திருவிழாவைப் பார்வையிடுவதற்கு பள்ளி, கல்லூரி மாணவர்கள் மட்டுமே அதிகளவில் வருவதாக கூறப்பட்ட நிலையில், புத்தக விற்பனையைப் பொருத்தவரை திருப்திகரமாக இருப்பதாக விற்பனையாளர்கள் தெரிவித்தனர்.

பள்ளி மாணவர்களைப் பொருத்தவரை, வரைபட புத்தகம், சிறுகதைப் புத்தகங்கள், புதிர்கள், உலக வரைபடம் என குறைந்தபட்சம் ரூ.200 மதிப்பிலான புத்தகங்கள், பொருள்களை வாங்கிச் செல்கின்றனர்.