ஆர்டிஇ, என்சிடிஇ சட்டங்களில் திருத்தம் தேவை

பிரதமருக்கு முதல்வர் மு.க.ஸ்டாலின் கடிதம்

- 

இலவச மற்றும் கட்டாயக் கல்வி உரிமைச் சட்டம் (ஆர்டிஇ), தேசிய ஆசிரியர் கல்விக் குழுமச் சட்டம்-1993 (என்சிடிஇ சட்டம்) ஆகியவற்றில் உரிய திருத்தம் செய்ய வலியுறுத்தி பிரதமர் மோடிக்கு முதல்வர் மு.க.ஸ்டாலின் கடிதம் எழுதியுள்ளார்.

கடித விவரம்: ஆர்டிஇ-2009 பிரிவு 23, என்சிடிஇ சட்டம்-1993 பிரிவு 12 ஏ-இல் உரிய திருத்தங்கள் மேற்கொண்டு, ஆசிரியர்களைப் பாதுகாப்பதுடன், பதவி உயர்வுகளுக்கு தகுதி உடையவர்களாக இருப்பதையும், குழந்தைகளின் கல்வியும் பாதிக்கப்படாமல் இருப்பதையும் உறுதி செய்ய வேண்டும்.

உச்சநீதிமன்றத்தால் அண்மையில் வழங்கப்பட்ட தீர்ப்பில், ஆசிரியர் தகுதித் தேர்வில் (டெட்) தேர்ச்சி பெறாத பணியில் உள்ள அனைத்து ஆசிரியர்களும், அந்தப் பணியில் தொடர 2 ஆண்டுகளுக்குள் டெட் தகுதியைப் பெற வேண்டும். மேலும், 5 ஆண்டுகளுக்கும் குறைவான பணிக்காலம் உள்ள ஆசிரியர்கள் பணியைத் தொடர அனுமதிக்கப்பட்டாலும், டெட் தகுதி பெறாவிட்டால் பதவி உயர்வுக்குத் தகுதியற்றவர்களாக இருப்பார்கள் எனக் குறிப்பிடப்பட்டுள்ளது.

கடந்த 23.8.2010-க்கு முன்பு நியமிக்கப்பட்ட ஆசிரியர்களுக்கு, டெட் போன்ற புதிய தகுதித் தேவைகளிலிருந்து என்சிடிஇ தொடக்கத்தில் விலக்கு அளித்திருந்தது. இருப்பினும், உச்சநீதிமன்றத்தால் வழங்கப்பட்டுள்ள தற்போதைய தீர்ப்பு, ஆசிரியர்களுக்கு வழங்கப்பட்ட விலக்கை மீறி, டெட் கட்டாயமாக்கப்பட்டுள்ளது.