மழை வெள்ளத்தில் தென் மாவட்டங்கள்

நெல்லை தாமிரவருணியில் வெள்ளப்பெருக்கு திருச்சியில் குடியிருப்புகளை சூழ்ந்தது மழைநீர்

- 

திருநெல்வேலி, டிச. 13: திருநெல்வேலி மாவட்டத்தில் வியாழக்கிழமை இரவு முதல் வெள்ளிக்கிழமை காலை வரை விடிய விடிய கொட்டித் தீர்த்த மழையால் தாமிரவருணியில் வெள்ளப்பெருக்கு ஏற்பட்டது. குடியிருப்புகளுக்குள் மழைநீர் புகுந்ததால் இயல்பு வாழ்க்கை வெகுவாகப் பாதிக்கப்பட்டது.

விடிய விடிய பெய்த கனமழை காரணமாக, பல்வேறு பகுதிகளில் இருந்து காட்டாற்று வெள்ளம் தாமிரவருணியில் கலந்ததால் வெள்ளிக்கிழமை காலையில் தாமிரவருணி ஆற்றில் சுமார் 70 ஆயிரம் கன அடி தண்ணீர் சென்றது. இதனால், மேலநத்தம், சீவலப்பேரி பகுதிகளில் உள்ள தரைப்பாலங்கள் மூழ்கின. மேலப்பாளையம் - திருநெல்வேலி நகரம் இடையே போக்குவரத்து துண்டிக்கப்பட்டது. கருப்பந்துறை, விளாகம், பாடகசாலை, ராக்கன் திரடு, குன்னத்தூர் உள்ளிட்ட பகுதிகளைச் சேர்ந்த மக்கள் பாளையங்கோட்டைக்கு செல்வதற்கு 15 கி.மீ. தொலைவு சுற்றி சென்றனர்.

சீவலப்பேரி ஆற்றுப்பாலம் மூழ்கியதால், பாளையங்கோட்டை - அருப்புக்கோட்டை சாலையில் போக்குவரத்து துண்டிக்கப்பட்டது.