ആരോഗ്യത്തോടെ വളരട്ടെ കുട്ടികൾ

പോഷകബാല്യം പദ്ധതിയുടെ ഭാഗമായി അങ്കണവാടി പ്രീ സ്കൂൾ കുട്ടികൾക്ക് ഓഗസ്റ്റ് ഒന്നുമുതൽ പാലും മുട്ടയും നൽകിത്തുടങ്ങിയിരിക്കുകയാണ്

- വീണാ ജോർജ് ആരോഗ്യവകുപ്പ് മന്ത്രി

നല്ല ആരോഗ്യമുള്ള കുഞ്ഞ് എല്ലാവരുടെയും സ്വപ്നമാണ്. അമ്മയുടെ ആരോഗ്യവും കുഞ്ഞിന്റെ ആരോഗ്യവും തമ്മിൽ അഭേദ്യമായ ബന്ധമുണ്ട്. കുഞ്ഞിന്റെ ആദ്യ ആയിരംദിനം മുൻനിർത്തി പ്രത്യേക പരിപാടി തന്നെ ആവിഷ്കരിച്ചിട്ടുണ്ട്.

കുഞ്ഞുങ്ങളുടെ ആരോഗ്യത്തിന് മുലപ്പാൽ വളരെ പ്രധാനമാണ്. ആദ്യ ഒരു മണിക്കൂറിൽ നവജാതശിശുവിന് മുലപ്പാൽ നൽകുന്നുവെന്ന് ഉറപ്പാക്കണം. അതുപോലെ ആദ്യ ആറുമാസം മുലപ്പാൽ മാത്രം നൽകുകയും വേണം. ഈ രണ്ട് കാര്യങ്ങളും കുഞ്ഞിന്റെ വളർച്ചയിൽ നിർണായകമാണ്.

കുഞ്ഞുങ്ങളുടെയും അമ്മമാരുടെയും ആരോഗ്യം ഉറപ്പുവരുത്താൻ അങ്കണവാടികൾവഴി സേവനങ്ങൾ നൽകി വരുന്നുണ്ട്. കുഞ്ഞുങ്ങളുടെ ബൗദ്ധികവും വൈകാരികവും സാമൂഹികവും ആരോഗ്യപരവുമായ വികാസത്തിന് ഊന്നൽ നൽകി ആറ് സേവനങ്ങളാണ് അങ്കണവാടികൾ വഴി നൽകുന്നത്. അതിൽ ഏറ്റവും പ്രധാന സേവനമാണ് അനുപൂരക പോഷകാഹാരപദ്ധതി. ഈ പദ്ധതിപ്രകാരം ആറുമാസം മുതൽ ആറുവയ സ്സുവരെയുള്ള കുട്ടികൾ, ഗർഭിണികൾ, പാലൂട്ടുന്ന അമ്മമാർ എന്നിവർക്ക് അങ്കണവാടികളിലുടെ അനുപൂരക പോഷകാഹാരം നൽകിവരുന്നുണ്ട്.