ആശങ്കയുടെ വിസ്ഫോടനം

രാജ്യാന്തരതലത്തിൽ വൻതോതിൽ ചർച്ചയായി ഇറാനിലെ ഷഹീദ് റജയി തുറമുഖത്തെ സ്ഫോടനം

- അജീഷ് മുരളീധരൻ

ഇറാനിലെ ബന്ദർ അബ്ബാസ് ഷഹീദ് റജയി തുറമുഖത്തിലെ വൻ സ്ഫോടനം ലോകമാകെ ചലനങ്ങൾ സൃഷ്ടിക്കാൻ പോന്ന ഒന്നാണ്. ആയിരത്തിലേറെ പേർക്കാണു സ്ഫോടനത്തിൽ പരുക്കേറ്റത്. ആഭ്യന്തര സുരക്ഷാ പിഴവുകളാണ് സ്ഫോടനത്തിനു കാരണമെന്നു പറയുന്നുണ്ടെങ്കിലും ഇറാൻ സ്ഥിരീകരിച്ചിട്ടില്ല. രാസവസ്തുക്കൾ നിറച്ച കണ്ടയ്നറുകൾ സംഭവത്തിനു മുൻപ് തുറമുഖത്ത് എത്തിയിരുന്നതായും ഇവയാണു സ്ഫോടനമുണ്ടാക്കിയതെന്നും രാജ്യാന്തര എജൻസികൾ റിപ്പോർട്ട് ചെയ്തു. മിസൈൽ ഇന്ധനമാണ് ഇതെന്നും റിപ്പോർട്ടുകളുണ്ട്. ചൈനയും റഷ്യയുമാണു മിസൈൽ നിർമാണത്തിൽ ഇറാനു വേണ്ട സഹായങ്ങൾ നൽകുന്നത്. സ്ഫോടനത്തിന് മുൻപു രണ്ട് ചൈനീസ് കപ്പലുകൾ ഷഹീദ് റജയി തുറമുഖത്ത് എത്തിയിരുന്നു. ഒമാനിൽ ഇറാനും യുഎസും തമ്മിൽ ആണവ പദ്ധതി സംബന്ധിച്ച ചർച്ചകൾ നടക്കുന്നതിനിടെയാണ് സ്ഫോടനം.