പെരിയാർ താണ്ടിയ പെരിയോൾ

ഇരു കൈകളും കെട്ടി പെരിയാർ നീന്തിക്കടന്ന 79കാരി ആരിഫ ആത്മധൈര്യത്തിൻറ പര്യായമാണ് ഈ ആലുവക്കാരി...

- ശ്രീമതി ഭട്ട്

പെരിയാർ പതിവുപോലെ ഒഴുകിയ ഒരു പകലായിരുന്നു അത്. പക്ഷേ, പതിവിനൊത്ത ആ പകലിനെ അസാധാരണമാക്കാൻ തക്ക മാറ്റുള്ള ഒരു ചലനത്തിന് പുഴ അന്ന് വേദിയായി. പുഴവെള്ളത്തിന്റെ കുത്തൊഴുക്കിനു കുറുകെ ചാട്ടുളികണക്കെ ഒരു പെൺശരീരം കുതിച്ചു. മെയ് വഴക്കമുള്ള മത്സ്യത്തെപ്പോലെ ഇരുകൈകളും പിന്നിൽ കൂട്ടിക്കെട്ടി ഓളങ്ങളെ വകഞ്ഞ് അവർ മുന്നേറുമ്പോൾ കരയിൽ കരഘോഷങ്ങൾ മുഴങ്ങി. പുഴയുടെ വന്യതയെ സധൈര്യം ഭേദിച്ച ആ സാഹസികയ്ക്ക് പ്രായം 79... പേര് മണക്കപ്പറമ്പിൽ ആരിഫ.

 അസ്വാഭാവികമായി ഒന്നും അവകാശപ്പെടാനില്ലാത്ത ജീവിതത്തിന്റെ ഉടമയാണ് ആരിഫ. യാഥാസ്ഥിതിക കുടുംബത്തിൽ ജനിച്ച് വളരെ ചെറുപ്പത്തിൽ തന്നെ വിവാഹം കഴിച്ച്, കുട്ടികളും പ്രാരാബ്ദങ്ങളുമായി ജീവിക്കുന്ന സാധാരണ സ്ത്രീയാണ് അവർ. പക്ഷേ, ആരിഫയുടെ കഥയെ വേറിട്ടതാക്കുന്ന ഒന്നുണ്ട്. ആത്മധൈര്യം. ഈ ജീവിതത്തിന് എന്തെങ്കിലും അർഥമുണ്ടാകണമെന്ന അതിയായ ആഗ്രഹത്തിൽ നിന്നും ഊർജം ഉൾക്കൊണ്ട് ആത്മധൈര്യം. 2022 ജനുവരിയിൽ കൈകൾ രണ്ടും പിന്നിലേക്ക് കൂട്ടിക്കെട്ടി ആരിഫ പെരിയാർ നീന്തി കടന്നതും ഈ ആത്മധൈര്യത്തിന്റെ കൂട്ടുപിടിച്ചാണ്. പ്രായം തടസ്സങ്ങളുടെ മതിൽക്കെട്ടല്ലെന്ന് അവർ തെളിയിച്ചു.

ധൈര്യത്തിന്റെ കൈപിടിച്ച്

കഴിഞ്ഞ 20 വർഷമായി പാലിയേറ്റിവ് കെയർ സെന്ററിൽ വോളണ്ടിയറാണ് ആരിഫ “ഞാൻ ഒരു സാധാരണ സ്ത്രീയാണ്. പല തരത്തിലുള്ള ചിട്ടകളുടെയും വിശ്വാസങ്ങളുടെയും ഇടയിലാണ് വളർന്നത്. വീടിന് അടുത്തുള്ള പുഴയിൽ അലക്കാനും കുളിക്കാനും മറ്റുമാണ് ഒറ്റയ്ക്ക് പോകുന്നത്. 15 വയസ് വരെയൊക്കെയേ അതും ഉണ്ടായുള്ളൂ. പിന്നെ വിട്ടിട്ടില്ല. പഠിത്തം പോലും എട്ടാം ക്ലാസ്സിൽ നിന്നു. പെൺകുട്ടികളെ പഠിപ്പിച്ചിട്ട് കാര്യമില്ലെന്ന് വിശ്വസിക്കുന്ന കാലമാണത്. കല്യാണം കഴിഞ്ഞാണ് പലയിടത്തും പോകാനും ആളുകളുമായി ഇടപഴകാനും തുടങ്ങിയത്. സത്യത്തിൽ പല സ്ത്രീകളുടെയും അവസ്ഥ ഇപ്പോഴും ഇങ്ങനെയൊക്കെയാണ്... ആരിഫ പറയുന്നു.