ഉർവശി എന്ന പൊടിമോൾ

തെന്നിന്ത്യയിലെ നാലു ഭാഷകളിൽ അനവധി സിനിമകളിൽ നായികയായി എത്തിയ ഉർവശി ഇന്നും ജനങ്ങൾ ഇഷ്ടപ്പെടുന്ന സ്വഭാവനടിയായി അഭിനയരംഗത്ത് ജ്വലിച്ചു നിൽക്കുകയാണ്

- ശ്രീകുമാരൻ തമ്പി

പ്രശസ്ത നാടകനടനായ ചവറ വി.പി.നായർ കലാനിലയം സ്ഥിരം നാടകവേദിയുടെ നാടകങ്ങളിൽ അഭിനയിച്ചിരുന്നു. നർത്തകി എന്ന നിലയിൽ തിരുവനന്തപുരം സ്വദേശിനിയായ വിജയല നാടകവേദിയുടെ ഭാഗമായി. വൈകാതെ അവർ ഇരുവരും പ്രണയബദ്ധരാവുകയും തുടർന്ന് വിവാഹിതരാവുകയും ചെയ്തു. അവരുടെ ദാമ്പത്യത്തിന് സമ്മാനമായി കാലം മൂന്നു പെണ്മക്കളെ നൽകി. മൂത്തപുത്രിക്ക് കലാരഞ്ജിനി എന്നും രണ്ടാമത്തെ മകൾക്ക് കൽപ്പനാരഞ്ജിനി എന്നും മൂന്നാമത്തെ മകൾക്ക് കവിതാരഞ്ജിനി എന്നും അച്ഛനമ്മമാർ പേരിട്ടു. മൂന്നാമത്തെ മകളായ കവിതയെ അവൾ ഏറ്റവും ചെറുതായതുകൊണ്ട് വീട്ടിൽ എല്ലാവരും പൊടിമോൾ എന്നു വിളിച്ചു. ഈ മൂന്നു പെൺകുട്ടികൾ ക്കു താഴെ ആ ദമ്പതികൾക്ക് രണ്ട് ആൺകുട്ടികളും പിറന്നു. അച്ഛനമ്മമാർ അവർക്ക് കമൽറോയ് എന്നും പ്രിൻസ് എന്നും പേര് നൽകി. കവിതാരഞ്ജിനി എന്ന പൊടിമോളാണ് തെന്നിന്ത്യയിലെ നാലു ഭാഷകളിലുമുള്ള അനവധി സിനിമകളിൽ നായികയായി അത്ഭുതകരമായ  പ്രകടനം കാഴ്ചവെച്ച് പ്രശസ്തി നേടിയ ഉർവശി. ഇന്നും ജനങ്ങൾ ഇഷ്ടപ്പെടുന്ന സ്വഭാവനടിയായി അഭിനയരംഗത്ത് ജ്വലിച്ചു നിൽക്കുകയാണ് ഉർവശി എന്ന നടി. തമിഴ് നടൻ സൂര്യയ്ക്കും നടി അപർണ്ണാ ബാലമുരളിക്കും ദേശീയപുരസ്കാരം നേടിക്കൊടുത്ത സൂര പോട്  എന്ന തമിഴ് ചിത്രത്തിൽ നായകന്റെ അമ്മയുടെ വേഷത്തിൽ അസൂയാവഹമായ അഭിനയം കാഴ്ച വെച്ചതും ഉർവശി തന്നെ.