സംഗീതാർച്ചനയ്ക്കിടയിൽ ഗുരുവായൂരപ്പൻ നൽകിയ ഓടക്കുഴൽ പുണ്യവുമായി യേശുദാസ്

ദൈവിക സങ്കൽപ്പം പലർക്കും പലതരത്തിലാണ്. ചിലർക്ക് ദൈവം പരാശക്തിയാണ്. ചിലർക്ക് കർമ്മമാണ് ദൈവം. മറ്റുചിലർക്കാകട്ടെ കലയാണ് ദൈവം. അതേസമയം ചിലർക്ക് സർവ്വസ്വവും ദൈവമാണ്. വിശ്വാസം വ്യക്തിനിഷ്ഠമായി മുന്നോട്ടുപോകുന്ന സംഗതിയാണ് എന്ന് ചുരുക്കിപ്പറയാം. എന്നാൽ ഇക്കൂട്ടരിൽ ആരെങ്കിലും ദൈവത്തോട് നേരിട്ട് സംവദിക്കാറുണ്ടോ? പലർക്കും പല അനുഭവകഥകളും പറയാനുണ്ടാകും. അവ അംഗീകരിക്കുമ്പോഴും ദൈവത്തോട് നേരിട്ട് സംവദിക്കുന്ന അല്ലെങ്കിൽ സംവദിക്കുന്ന തായി തോന്നുന്ന ചില സംഗതികളുണ്ട്. അക്കൂട്ടത്തിൽ എടുത്തുപറയേണ്ടതാണ് ഗാനഗന്ധർവ്വൻ ഡോ.കെ.ജെ. യേശുദാസിന്റെ ഭക്തിഗാനങ്ങൾ. ദൈവം തലയിൽ കൈവച്ച് അനുഗ്രഹിച്ച ഗായകനാണ് അദ്ദേഹം. അതുകൊണ്ടാണല്ലോ അദ്ദേഹത്തെ മാലോകർ അനുഗൃഹീത കലാകാരൻ എന്ന് വിശേഷിപ്പിക്കുന്നത്.

- അനീഷ് മോഹനചന്ദ്രൻ

യേശുദാസിന്റെ ഗാനങ്ങൾ വിശിഷ്യാ എസ്. രമേശൻ നായരും പി.കെ. ഗോപിയുമൊക്കെ രചിച്ച വരികൾ അദ്ദേഹം ആലപിക്കുമ്പോൾ അത് ദൈവത്തോടുള്ള സംവേദനമായി പലർക്കം അനുഭവപ്പെടാറുണ്ട്. ഒരു കലാകാരനായിത്തന്നെ ദേവിയുടെ അല്ലെങ്കിൽ ദേവന്റെ മുന്നിൽ സ്വയം അർപ്പിച്ചാണ് അദ്ദേഹം ഓരോ ഗാനങ്ങളും ആലപിക്കുന്നത്. അതിൽ പലതും ദൈവത്തിന് സമർപ്പിക്കുന്ന സംഗീതാർച്ചനകളായി ഒരു ഭക്തന് തോന്നിയാൽ അതിൽ അത്ഭുതപ്പെടേണ്ടതില്ല. ഒരുദാഹരണം നോക്കാം.

ആദിമദ്ധ്യാന്തങ്ങൾ മൂന്ന് സ്വരങ്ങളായ്...

അളന്നവനേ.. ഈ സ്വരങ്ങൾ...

സ... സാരിധനിധനി
നി...സനിധമധാ
ധ... ധാനിധമഗമാ
ഗാമനാധിധ മാധനി സനി
ധാനിസാരിസ നി സരി ഗരി
സരി ഗാമഗരി ഗരി സാരി
നി സനി ധാനിധ മാധമ ഗാമധ നി..

ഈ സ്വരങ്ങൾ നിനക്കർച്ചനാ പുഷ്പങ്ങൾ സ്വീകരിച്ചാലും ഹരേ കൃഷ്ണാ...

എസ്. രമേശൻ നായരുടെ തൂലികയിൽ പിറന്ന ഈ അതിമനോഹര ഗാനം മയിൽപ്പീലി എന്ന വിഖ്യാത ഹിന്ദുഭക്തിഗാന ആൽബത്തിലേതാണ്. ഭഗവാന്റെ മുന്നിൽ കണ്ഠം കൊണ്ടല്ല അദ്ദേഹം ഈ വരികൾ ആലപിച്ചത്, ഹൃദയം കൊണ്ടാണ് എന്നുപറഞ്ഞാൽ അതിൽ തെല്ലും അതിശയോക്തി ഉണ്ടാകില്ല. ഭഗവാനുമായി അദ്ദേഹം നേരിട്ട് സംവദിക്കുകയാണ് എന്ന് തോന്നിപ്പോ കുംവിധമാണ് ഈ വരികൾ ഹൃദയത്തിലേക്ക് വന്നുതറയ്ക്കുക.

തന്റെ എല്ലാ പിറന്നാളിനും യേശുദാസ് ഗാനാർച്ചന നടത്താനെത്തുന്നത് വാഗ്ദവതയായ മൂകാംബികാദേവിക്ക് മുന്നിലാണ്. അവിടെ സരസ്വതിമണ്ഡപത്തിൽ അദ്ദേഹം മണിക്കൂറുകളോളം സംഗീതാർച്ചന നടത്താറുണ്ട്.