મેઘમહેરઃ કચ્છમાં અતિભારે, સૌરાષ્ટ્ર અને દક્ષિણ ગુજરાતમાં ભારે વરસાદની આગાહી

રાજ્યના સાત જિલ્લામાં ઓરેન્જ, ત્રણમાં યલો એલર્ટ જારી: અરવલ્લી જિલ્લામાં ભારે વરસાદથી તારાજીઃ ૧૯ ઓગસ્ટ બાદ વરસાદી સિસ્ટમ નબળી પડશે

અમદાવાદ, બુધવાર

રાજ્યમાં છેલ્લા થોડા દિવસથી ફરીથી ધોધમા૨ વરસાદ વરસી રહ્યો હોવાના પગલે લોકોમાં ફફડાટ ફેલાયો છે. અનેક વિસ્તારમાં મેઘરાજા મન મૂકીને વરસી રહ્યા છે ત્યારે લોકો હવે વરસાદને વિરામ લેવા માટે પ્રાર્થના કરી રહ્યા છે પરંતુ આગામી ૨૪ કલાક હજુ પણ વરસાદી વિરામ મળશે નહીં. હવામાન વિભાગે આગામી ૨૪ કલાકમાં અતિભારે વરસાદની આગાહી કરી છે. ભારે વરસાદની આગાહીના પગલે આજે પણ સાત જિલ્લામાં યલો એલર્ટ જાહેર કરાયું છે. દક્ષિણ ગુજરાતના ત્રણ જિલ્લામાં ઓરેન્જ એલર્ટ જાહેર કરવામાં આવ્યું છે. આજે બનાસકાંઠા, પાટણ, સાબરકાંઠા, મહેસાણા, કચ્છ, અમરેલી અને ગીર સોમનાથમાં ભારે વરસાદની શક્યતા છે. ૧૯ ઓગસ્ટ બાદ વરસાદી સિસ્ટમ નબળી પડશે.