அன்புள்ள ஆசிரியருக்கு...

மதம் பிடிக்காத யானை !அறிவியல் வளர்ச்சியை யாராலும் தவிர்க்க இயலாது. தற்போதுள்ள வளர்ச்சியின் வேகம் மலைக்க வைக்கிறது. அதற்குச் சான்றாக செயற்கை நுண்ணறிவுத் துறையைச் சொல்லலாம். நாம் கேட்கும் கேள்விகளுக்கான பதிலை, இணையதளத்தின் எல்லா அடுக்குகளில் இருந்தும் தேடித் தந்து விடுகிறது (‘செயற்கை நுண்ணறிவு-இருமுனைக் கத்தி!'-கட்டுரை-எஸ்.எஸ். ஜவஹர், 30.10.25). இது நல்ல விஷயம்தான் என்றாலும், அந்த செயற்கை நுண்ணறிவை உளவு பார்ப்பதில் பயன்படுத்தினால், அதன் தாக்கம் பெரும் பிரச்னையை ஏற்படுத்தும். மருத்துவத் துறையில் அதன் உதவி பேருதவியாக இருப்பதை மறுப்பதற்கில்லை. ஆனாலும், அது குறித்து ஒரே வரியில் சொல்வதென்றால், மதம் பிடிக்காத யானை என்றுதான் சொல்லத் தோன்றுகிறது.தே. காளீஸ்வரன், மதுரை.

- 

கபடிக்கும் முக்கியத்துவம்

சர்வதேச கபடி கூட்டமைப்பு சார்பில், இதுவரை நடைபெற்ற மூன்று உலகக் கோப்பை கபடிப் போட்டிகளில் ஆடவர் பிரிவில் இந்தியாவே சாம்பியன் பட்டத்தை வென்றுள்ளது. ஆசிய இளையோர் கபடிப் போட்டி முதல் முறையாக நிகழாண்டு சேர்க்கப்பட்டு மூன்றாவது ஆசிய இளையோர் போட்டி பஹ்ரைனில் நடைபெற்றதில் ஆடவர், மகளிர் என இரு பிரிவுகளிலுமே தங்கப் பதக்கம் வென்று சாதனை படைத்திருப்பது இந்திய விளையாட்டுத் துறைக்குக் கிடைத்த அங்கீகாரம். ('இரட்டைப் பெருமை!'-ஆசிரியர் உரை, 31.10.25). தமிழக வீரர் அபினேஷ், வீராங்கனை கார்த்திகா இருவருமே சாதாரண குடும்பப் பின்னணியில் இருந்து வந்தவர்கள். கிரிக்கெட், செஸ் போட்டியாளர்களுக்கு தரப்படும் முக்கியத்துவத்தை கபடிக்கும் தந்து மாநில அரசு கூடுதல் நிதி ஒதுக்கீடு செய்ய வேண்டும்.

சீ. காந்திமதிநாதன், கோவில்பட்டி.

சேமிப்பே முதன்மை