திருப்பரங்குன்றம் சுப்பிரமணிய சுவாமி கோயிலில் குடமுழுக்கு

பல்லாயிரக்கணக்கான பக்தர்கள் பங்கேற்பு

- 

திருப்பரங்குன்றம், ஜூலை 14: மதுரை திருப்பரங்குன்றம் சுப்பிரமணிய சுவாமி கோயிலில் திங்கள்கிழமை நடைபெற்ற குடமுழுக்கு விழாவில் பல்லாயிரக்கணக்கான பக்தர்கள் பங்கேற்றனர்.

அறுபடை வீடுகளில் முதல் படை வீடான திருப்பரங்குன்றம் சுப்பிரமணிய சுவாமி கோயில் குடமுழுக்கையொட்டி, ரூ.2.50 கோடியில் திருப்பணிகள் கடந்த பிப்.10-ஆம் தேதி தொடங்கி நடைபெற்றது. திருப்பணிகள் நிறைவு பெற்று கோயில் வளாகத்தில் உள்ள கம்பத்தடி மண்டபம், மகா மண்டபம், திருவாச்சி மண்டபம், வல்லப கணபதி சந்நிதி உள்ளிட்ட பல்வேறு மண்டபங்களும் புதுப்பொலிவுடன் காட்சியளித்தன. கோயிலில் கல் தூண்களில் உள்ள சிம்ம முகங்கள், யாழிகள் அனைத்தும் பழைமை மாறாமல் புதுப்பிக்கப்பட்டன. இதேபோல, கோயில் ராஜகோபுரமும் வண்ணம் தீட்டப்பட்டு புதுப்பொலிவு பெற்றது.

யாக சாலை பூஜைகள்: குடமுழுக்கையொட்டி, சுப்பிரமணிய சுவாமி, சத்தியகிரீஸ்வரர், துர்க்கை அம்மன் உள்ளிட்ட தெய்வங்களுக்கும், பரிவார மூர்த்திகளுக்கும் ஆகம விதிப்படி 75 யாக குண்டங்கள் அமைக்கப்பட்டு, கடந்த 10-ஆம் தேதி மாலை முதல்கால யாகசாலை பூஜை தொடங்கியது. இதைத்தொடர்ந்து, இரண்டாம், மூன்றாம் கால யாக சாலை பூஜைகள் நடத்தப்பட்டு, ஞாயிற்றுக்கிழமை மாலை ஏழாம் கால யாக சாலை பூஜை நடைபெற்றது.