அனைத்துக் கட்சிகள் கூட்டத்தில் தலைவர்கள் பேசியது என்ன?

மக்களவைத் தொகுதி மறுசீரமைப்பு விவகாரம் தொடர்பாக சென்னையில் புதன்கிழமை நடைபெற்ற அனைத்து கட்சிக் கூட்டத்தில் பங்கேற்ற தலைவர்கள் அனைவரும் அரசின் தீர்மானத்தை ஆதரித்து கருத்து தெரிவித்தனர்.

- 

சென்னை, மார்ச் 5: மக்களவைத் தொகுதி மறுசீரமைப்பு விவகாரம் தொடர்பாக சென்னையில் புதன்கிழமை நடைபெற்ற அனைத்து கட்சிக் கூட்டத்தில் பங்கேற்ற தலைவர்கள் அனைவரும் அரசின் தீர்மானத்தை ஆதரித்து கருத்து தெரிவித்தனர்.

ஆர்.எஸ்.பாரதி (திமுக): ஆலோசனையின் அடிப்படையில்தான் முடிவு எடுக்க வேண்டும் என்று அண்ணா கூறுவார். கருணாநிதியும் அனைத்து கட்சிகளின் கருத்துக்களைக் கேட்டு தமிழகத்துக்காக குரல் கொடுத்தவர். தற்போது அந்த வழியில் முதல்வரும் அனைத்து கட்சிகளோடு ஆலோசிக்கிறார். அரசின் முடிவுக்கு திமுக ஆதரவை வழங்கும்.

டி.ஜெயக்குமார் (அதிமுக): மக்கள்தொகையை தமிழகம் கட்டுப்படுத்தியுள்ளது. ஆனால், வட மாநிலங்கள் கட்டுப்படுத்தவில்லை. அதனால், மக்கள் தொகை அடிப்படையில் மறுசீரமைப்பு செய்தால் தமிழகம் உள்ளிட்ட மாநிலங்கள் பாதிக்கப்படும். தற்போதுள்ள 543 மக்களவைத் தொகுதிகளின் எண்ணிக்கையை மாற்றாமல், ஒவ்வொரு மாநிலத்தின் மக்களவைத் தொகுதிகளின் சராசரி மக்கள்தொகை அடிப்படையில் மறுசீரமைப்பு செய்தால் எந்த மாநிலத்துக்கும் பாதிப்பு வராது. அனைத்து கட்சிக் கூட்டத்தில் கொண்டுவந்துள்ள தீர்மானத்தை அதிமுக முழுமையாக ஆதரிக்கிறது.