பாஜகவை வீழ்த்த ஜனநாயக சக்திகள் ஒன்றிணைய வேண்டும்

மத்திய பாஜக அரசை வீழ்த்த ஜனநாயக சக்திகள் ஓரணியில் திரளவேண்டும் என இந்திய கம்யூனிஸ்ட் கட்சியின் தேசிய பொதுச் செயலர் டி.ராஜா கூறினார்.

- டி. ராஜா

சேலம், ஆக. 18:

சேலத்தில் திங்கள்கிழமை நடைபெற்ற இந்திய கம்யூனிஸ்ட் கட்சியின் மாநில மாநாட்டில் அவர் பேசியதாவது:

கட்சி நூற்றாண்டை கொண்டாடும் வேளையில், அடுத்த அகில இந்திய மாநாடு பஞ்சாப் மாநிலம், சண்டிகரில் நடைபெறவுள்ளது. இதற்கான அரசியல் தீர்மானம் ஏற்கெனவே வெளியிடப்பட்டுள்ளது. இந்தத் தீர்மானங்கள் தற்போதைய அரசியல் போக்குகளை ஆழமாக ஆராய்கிறது.

அமெரிக்க அதிபர் டிரம்பின் முதலாளித்துவ கொள்கைகளால் உலக பொருளாதாரம் எந்தளவுக்கு பாதிக்கப்படுகிறது என்பது உள்பட பல்வேறு பகுதிகளில் நடைபெறும் மாற்றங்களை நமது அரசியல் தீர்மானம் பிரதிபலிக்கிறது. தமிழர்கள், சிறுபான்மையின மக்களின் நலன்கள், தமிழக மீனவர்களின் நலன்கள் பாதுகாக்கப்பட வேண்டும் என தீர்மானம் வலியுறுத்துகிறது.

மேற்கு ஆசியாவில் பாலஸ்தீன மக்கள் நாள்தோறும் கொல்லப்படுகிறார்கள். அங்கு இஸ்ரேலிய ராணுவத்தால் இனப்படுகொலை நடைபெற்று வருகிறது. மானுடத்துக்கு எதிராக போரை நடத்தும் இஸ்ரேலுக்கு அமெரிக்கா துணைநிற்கிறது. அதற்கு இந்திய பிரதமர் மோடியும் துணைபோகிறார்.